Ich Jans von Potenprunn und all mein eriben vergehen und tuen chunt offenlich mit dem brief allen den di in sehent oder hoernt lesen, di nu lebent oder hernach chuenftig sind, das wier mit wol bedachtem muet mit guetlichem willen, nach unsrer nachsten und pesten freunt rat, z'der zeit do wier es mit recht wol getuen mochten und mit unsers rechten lehenherren hant des hochwierdigen fuersten bischof Albrechtes von Pazzowe recht und redlich unsers rechten lehens, das wier von im und seinem gotzhaus ze lehen gehabt haben, haben wier verchouft und geben dem erwierdigen und geistlichen herren hern U^elreichen dem Veyertager probst des gotzhaus datz Sand Poelten und der gemain des conventes daselbs unsern zehent der ge legen ist ze Jewttendorf in Chappeller pharr, grozzen zehent und chlainen, gestiften und ungestiften, ze velde und ze dorfe, wie der genant ist oder wo der gelegen ist, in allen den rechten ern und nuetzen, als wier den unversprochenlich inngehabt und herpracht haben, und haben in den gegeben umb siben und zwainzig phunt wienner phenning, der wier ganz und gar verricht und gewert sein. Und sein wier des vorgenanten zehentes ier und iers gotzhaus ier recht gewer und scherm fuer all ansprach, alz lehens und des landes recht ist in Oesterreich. Get in fuerbas dar an icht ab mit recht oder ob si icht chrieg oder ansprach mit recht dar an gewunnen, von wem daz wêr, das schullen wier in alles ausrichten ablegen und widerchern und^a schullen sew das haben auf uns und auf allen dem guet das wier haben in dem land ze Oesterreich oder wo wier das haben, wier sein lebentig oder tode. Des ze uerchuend gib ich egenanter Jans den brief versigelten mit meinem insigel und mit Alramen des wierts meines aidem insigel und mit Jansen des Olachter meins vettern insigel, di ich des vleizzichleich darumb gepeten han, daz si der sache zeug sind mit iern insigeln. Geben datz Sand Poelten, nach Christi gepu^erd dreuzehen hundert jar darnach in dem siben und sechzigisten jar, des mitichen nach sand Jacobs tag.

Source Fulltext: LAMPEL, Urkunden Sanct Pölten (=FRA I, Wien 1981) S. 694-695