Ich Fridreich der marschalch von Pappenhaim, ich Kathrey sein hausvrowe und all unser erben vergehen und tün chünt offenlich mit dem brief allen den di in sehent hörnt oder lesent, di nu lebent und hernach chunftig sind, daz wïr recht und redlîch verchauft haben unsers rechten aigens die manschaft und aigenschaft aines halben hofs gelegen datz Inning, den Mert von Inning von uns ze lehen gehabt hat und die wïr vormals von Ulreichen von Lanstorf gechauft haben, mit allen eren und rechten als wi^er di^e gehabt haben, umb zehen pfund wienner pfenning der wir genzlîch und gar gericht und gewert sein dem erwirdigen geistlichen herren hern Ulreichen dem Veyrtager probst des gotshauses datz sand Po^elten, seinem convent, seinem gotshau^es und allen irn nachkömen daselbs fu^erwas ledichlîch und vreilîch ze haben und allen ir und ires gotshau^eses fru^emen damit ze schaffen verchaufen versetzen und geben wem si wellen an allen irsal; und sein der ir recht gewern und scherrn fu^er all ansprach, als aigens und des landes recht ist in Österreich. Get in fu^erwas daran icht ab mit recht oder ob si mit recht icht chrieg oder ansprach daran gewunnen von wem das wêr, daz schullen wi^er in alles ausrichten ablegen und widerchern und schu^ellen si daz haben auf uns und auf allen dem guet, das wir haben in dem lande ze Österreich oder wo wi^er das haben, wi^er sein lebentig oder tode. Mit urchund des briefs versigelt mit mein Fridreichs des marschalch von Pappenhaim² insigl, mit Petreins von Losenstain insigl³ meines öhaims und mit Marcharten insigel von Tyrnstain,⁴ di wir des vleizzichlich gepeten haben, daz si der sach zeugen sind mit i^e rn insiglen. Geben dacz sand Polten, nach Christes gepu^erde dreuzehen hundert jar darnach in dem a^echt und sechzgistem jar, dez nachsten phinztags nach sand Dorothes tag.

Source Fulltext: LAMPEL, Urkunden Sanct Pölten (=FRA II, Wien 1901) S. 11-12