Ich Dietreich der Ma^ewsel und all mein erben vergehen und tu^en chu^ent offenlich mit dem brief allen den di in sehent ho^ernt oder lesent, di nu lebent und hernach chu^enftig sind, daz wi^er recht und redlich verchaüft haben unsers rechten aigens ain halbs phunt und zwen und zwainzig wienner phenning geltes, di gelegen sind datz Wielantsperg^a auf ainer hofstat in Wilmaspurger^b pharr, da Jacob auf gesezzen ist, di ich und mein vordrew hausvrow vrow Ossanna sêlig und unser erben mit gesampter hant den purgern von Wilmaspurkch^b vor siben jarn umb sechs phunt phennig gesatzt haben, also daz wir oder wem wir daz vorgenant gut und gu^elt verchau^efêten her wider gelosen mo^egen umb sechs phunt phennig. Nu hab ich und all mein erben daz vorgenant gut und gu^elt mit alle di^e und dar zü geho^ert ze veld und ze dorf, gestift oder ungestift, versucht oder ungesucht, wie daz genant ist und wa daz gelegen ist, mit allen ern nu^etzen und rechten als wir daz in aigens gewer an all eribvogtei inngehabt und her pracht haben, haben wi^er verchauft und geben umb siben phunt siben schilling wienner phening der wir gar und gënzlich verricht und gewert sein, dem erwi^erdigen geistlichen herren hern Ulreichen dem Veyrtager probst dez gotshau^es datz sand Po^elten und seinem convent gemaindlich daselbs, also beschaidenlich daz seu daz vorgenant gut und gu^elt lo^esen schu^ellen und mo^egen umb sechs phunt phennig als wir daz gesatzt haben, und wenn seu daz getan habent, so sol dann daz vorgenant gu^et und gu^elt ir rechtes ledigs und vreis chaufgut sein und schu^ellen allen ir und irs gotshau^es frumen damit schaffen, verchaufen versetzen und geben wem si wellen an allen chrieg und irsal. Und sein wir dez i^er recht gewer und scherm für all ansprach, als aigens und des landes recht ist in O^esterreich; get in furbas daran icht ab mit recht oder ob si mit recht icht chrieg oder ansprach dar an gewu^ennen, von wêm daz wêr, daz schüllen wi^er in alles ausrichten ablegen und widerchern und schu^ellen seu daz haben datz uns und auf allen dem gu^et daz wir haben oder noch gewinnen, wir sein lebentig oder to^ed. Wir verzeihen auch uns, ich obgenanter Dietreich der Ma^ewsel und all mein erben aller der rechten die wir an dem obgenanten gut und gu^elt gehabt haben. Mit urchund dez briefs versigilt mit meinem insigil, mit hern Niclasen insigil dez Pillunges von sand Gylgenperig, mit Chunrates und Hainrechs pru^eder der Hu^eglinger insigil und mit Otten insigil dez Po^emer, di wir dez vleizzichlich gepeten haben, daz si der sach zeugen sind mit irn insigilen. Geben dacz Sand Po^elten, nach Christi gepurd dreuzehen hundert jar darnach in dem na^eun und sechzgistem jar, an sand Margareten tag der heiligen junchfrawen.

Source Fulltext: LAMPEL, Urkunden Sanct Pölten (=FRA II, Wien 1901) S. 65-66