Gregorius episcopus servus servorum dei venerabili fratri . . episcopo Pataviensi salutem et apostolicam benedictionem. Sedis apostolice providencia circumspecta desideria^a iusta petencium congruo favore prosequitur et circa ea que ecclesiarum monasteriorum et aliorum locorum ecclesiasticorum conmoda prospiciunt, se exhibet propiciam et benignam. Sane dudum pro parte dilectorum filiorum n prepositi et conventus monasterii sancti Ypoliti per prepositum soliti gubernari ordinis sancti Augustini, tue diocesis, nobis exposito quod, cum olim eorum monasterium in quo divinus cultus et observancia regularis pre ceteris parcium earundem monasteriis hactenus viguerint, propter gwerrarum discrimina et epidemie pestes multum in facultatibus esset collapsum, quondam Rudolfus dux Austrie verus patronus ecclesie sancti Stephani in Recza dicte diocesis eidem monasterio et personis in eo degentibus pio compaciens affectu, ut hospitalitas et alia pietatis opera possent in eo, ut consueverant, exerceri, ius patronatus ipsius ecclesie preposito et conventui ac monasterio predictis contulerat, ac bone memorie Gotfridus episcopus Pataviensis predecessor tuus, pie considerans premisso tractatu solemni cum dilectis filiis capitulo sue ecclesie Pataviensis et deliberacione inter se habita diligenti parrochialem ecclesiam predictam cum omnibus iuribus et pertinenciis suis eisdem preposito et conventui ac monasterio auctoritate ordinaria pro eorum necessitatibus relevandis et supportandis annexuerat unierat imperpetuum et incorporaverat, ita quod cedente vel decedente ipsius parrochialis ecclesie rectore qui tunc erat vel dictam ecclesiam alias dimittente liceret eis corporalem possessionem ecclesie ac iurium et pertinenciarum predictorum per se vel alium seu alios auctoritate propria apprehendere et tenere, cuiuscunque licencia minime requisita, ac per unum de canonicis ipsius monasterii vel per unum secularem presbyterum, cui de fructibus ipsius parrochialis ecclesie necessaria congrue ministrarentur, prefate parrochiali ecclesie facerent deserviri laudabiliter in divinis, ac humiliter suplicato ut, cum annexio unio et incorporacio huiusmodi in preiudicium ordinarii loci et ecclesie Pataviensis non redundaret, premissis omnibus robur confirmacionis adicere de benignitate apostolica dignaremur. Nos dilecto filio abbati monasterii Chotbicensis dicte diocesis nostris dedimus litteris in mandatis, ut vocatis qui forent vocandi de premissis omnibus et singulis et eorum circumstanciis universis et presertim de statu parrochialis ecclesie ac indigencia monasterii predictorum se diligencius informaret et quidquid per huiusmodi informacionem reperiret in premissis per suas litteras in publicam formam redactas eiusque sigillo sigillatas predictarum litterarum seriem continentes nobis quantocius intimare curaret, ut sua super hoc informacione instructi in premissis consulcius agere valeremus, prout in eisdem litteris plenius continetur. Et deinde dictus abbas, sicut nobis nuper per eius litteras innotuit, prefatis litteris nostris per eum receptis de premissis omnibus et singulis iuxta predictarum litterarum nostrarum continenciam et tenorem diligencius se informavit nobisque per suas patentes litteras manu publica confectas retulit premissa nobis exposita fore vera. Cum autem, sicut exhibita nobis pro parte dictorum prepositi et conventus peticio continebat, predicta unio, que nondum sortita fuit effectum propter revocacionem per felicis recordacionis Urbanum papam V. predecessorem nostrum de unionibus quibuscunque que effectum sortite non erant factam, iuribus non subsistat, pro parte ipsorum prepositi et conventus nobis fuit humiliter suplicatum ut providere eis sive^b per hoc de benignitate apostolica dignaremur. Nos itaque huiusmodi suplicacionibus inclinati fraternitati tue, de qua in hiis et in aliis in domino specialem fiduciam obtinemus, per apostolica scripta committimus et mandamus quatinus predictam parrochialem ecclesiam cum omnibus iuribus et pertinenciis eisdem preposito et conventui et per ipsos eidem monasterio reservata tamen prius et assignata per te de ipsius parrochialis ecclesie proventibus pro perpetuo vicario per te instituendo canonice in eadem perpetuo in ea virtutum domino servituro porcione congrua, ex qua idem vicarius valeat conmode sustentari apostolica iura solvere et alia sibi incumbencia onera supportare, auctoritate apostolica unias annectes perpetuo et incorpores, ita quod cedente^c vel decedente ipsius parrochialis ecclesie rectore qui nunc est vel dictam parrochialem ecclesiam alias dimittente, liceat eis corporalem possessionem parrochialis ecclesie iuriumque et pertinenciarum predictorum per eos vel alium sew alios auctoritate propria apprehendere et tenere ipsamque parrochialem ecclesiam licite imperpetuum retinere fructusque ipsius in supportacionem dictorum onerum et utilitatem eiusdem monasterii convertere valeant, diocesani loci qui erit pro tempore vel alterius cuiuscumque licencia minime requisita, contradictores auctoritate nostra appellacione postposita compescendo, non obstantibus dicti Urbani predecessoris nostri et aliis constitutionibus apostolicis contrariis quibuscunque, sew si aliqui super provisionibus sibi faciendis de huiusmodi parrochialibus ecclesiis aut aliis beneficiis ecclesiasticis in illis partibus speciales et generales dicte sedis vel legatorum eius litteras impetravit, eciam si per eas ad inhibicionem reservacionem et decretum vel alias quomodolibet sit processum, quas litteras et processus habitos per easdem et quecumque inde secuta ad prefatam parrochialem ecclesiam volumus non extendi, sed nullum per hoc eis quo ad assecucionem parrochialium ecclesiarum et beneficiorum aliorum preiudicium generari, sew quibuscunque privilegiis indulgenciis et litteris apostolicis generalibus vel specialibus quorumcumque^d tenorum existant perque presentes^e non expressa vel totaliter non inserta effectus earum impediri valeat quomodolibet vel differri et de qua cuiusque toto tenore de verbo ad verbum habenda sit in nostris litteris mencio specialis. Nos enim ex nunc irritum decernimus et inane, si secus super hiis a quoquam quamvis auctoritate scienter vel ignoranter contigerit attemptari. Datum Avinione, X. kal. aprilis, pontificatus nostri anno tercio.||
Armandus.

Source Fulltext: LAMPEL, Urkunden Sanct Pölten (=FRA II, Wien 1901) S. 139-142