Ich Fridreich der Hagenawêr, ich Agnes sein hausfraw und all unser erben vergehen und tun kunt offenlich mit dem brief allen den di in sehent hörnt oder lesent, di nu lebent und hernach^a chünftig sind, daz wir mit wolbedachten^b müt mit gesampter hant und auch nach rat unser nachsten und pesten freunt, zü der zeit daz^c wir ez wol getün machten, recht und redlich verchauft haben unsers rechten ledigen vreins^d aigens unsern hof dacz Anger gelegen in Pehemchirher pharr, davon wir jêrlich der erbern frawen frawen Kathrein der Mutschrotinn an sand Michels^e in leibgedings weise sechs schilling wienner phenig gedint haben, di si von hern Ulreichen von Rorbach zü iren lebtêgen gechauft hat, so beschaidenlich, wenn daz ist daz derselb her Ulreich von Rorbach mit dem tod abget, so süllen di vorgenanten sechs schilling phenning leibgeding ledig und loz sein von der egenanten frawen Kathrein der Mutschrotinn und iren erben; und sunderlich so haben wir verchaüft daz holz gelegen an dem Prawnzekk, daz zü demselben hof gehört, davon wir jerlich dem . . abt gen Chotweig ain halbs phunt wienner phening an sand Michels tag gedint haben und nicht mer; auch haben wir verchauft ain holz gelegen an dem Chernperg, daz wir von Stephann dem Hagenawër des Prawnn sun von Hagenawe gelöst und vergolten haben; und darnach haben wir verchauft dritthalb phunt und siben und dreizzich wienner phening gelts gelegen auf behausten gütern. gestifter holden und auf überlende, di man uns jêrlich gedint hat in den obgenanten hof dacz Anger. Denselben hof dacz Anger, daz holz an dem Praunsekk, daz holz am Chernperig und di egenanten dritthalb phunt und siben und dreizzich wienner phening gelts mit alle die und^f dar zu^e geho^ert, es sei paw wismad weingërten pawngërten waid holz phenninggült in urbar oder auf überlende, ze veld und ze dorf, gestift und ungestift, versucht und unversucht, wie daz genant oder wo daz gelegen ist, mit allen den nüczen und rechten, mit sampt dem vogtreicht^g daz wir auf denselben gütern oder anderswo gehabt haben unversprochenlich in aigens und purchrechtes gewer, haben wir verchauft und geben umb hundert phunt und dreizzich phunt wienner phenning, der wir genzlich verricht und gewert sein, den erwirdigen geistlichen herren hern Leütolden probst dez gozhauses dacz sand Po^elten, Niclasen techant und dem convent gemainchlich daselbens und allen irn nachko^emen fürbaz ledichlich und freilich ze haben und allen iren und irs goczhauses frum damit ze schaffen, verchaufen verseczen und geben wem si wellent an allen chrieg und irsal. Und sein wir dez ich obgenanter Fridrich der Hagenawêr, ich Agnes sein hau^esfrawen und all unser erben ir recht gewer und scherm für all ansprach als aigens und purchrechtes recht ist in dem lande ze Österreich; get in aber fürbaz daran icht ab mit recht oder ob si mit recht icht chrieg oder ansprach daran gewünnen von wem daz wer, daz sullen wir in genzlich ausrichten ablegen und auch widerchern an allen irn schaden, und sullen si daz haben dacz uns und auf all dem gu^et, es sei erbgu^et oder varundgut, wie daz genant ist, daz wir haben oder noch gewinnen in dem lande ze Österreich oder wo wir daz habn, wir sein lebentig oder tode. Dar uber geben wir, ich obgenanter Fridreich der Hagenäwêr für mich und für all mein erben den vorgenanten herren hern Leütolden probst Niclasen techant und dem convent dacz sand Pölten und allen irn nachkömen den brief besigelten mit meinem insigl; und der sach sind gezeugen unser nachst frewnt Hanns, Jacob und Stephan di Hagenawer, Rüger der Piber und Ulreich der Gnau^ezz mit iren insigeln, die wir darumb vlizziglich gepeten haben; und wann ich obgenante Agnes selb aigens insigils nicht enhan, darumb so verpind ich mich für mich und für all mein erben mit meinen trewn ündër di gegenwürtigen insigl allez daz gënzlich stet ze haben daz vor an dem brief geschriben stet. Geben nach Christi gepurde dreuzehenhundert jar darnach in dem vïr und sibenzkisten jare, dez mëntags vor dem heiligen weinachtag.

Source Fulltext: LAMPEL, Urkunden Sanct Pölten (=FRA II, Wien 1901) S. 155-157