In Christi nomine; amen. Presentis instrumenti publici tenore cunctis pateat manifeste, quod anno a nativitate domini millesimo trecentesimo septuagesimo quinto, die XXVI mensis iunii, hora nona vel citra, indiccione XIIIa, pontificatus sanctissimi in Christo patris et domini nostri domini Gregorii divina providentia pape XI. anno quinto, in mei notarii publici testiumque subscriptorum ad hoc specialiter vocatorum et rogatorum presencia constitutus honorabilis vir Leutoldus de Ro^er rector parrochialis ecclesie sancti Martini in Pruchka prope Leyta Pataviensis diocesis quasdam litteras apostolicas sanctissimi in Christo patris et domini nostri, domini Gregorii pape predicti, una cum processibus reverendissimi in Christo patris et domini domini Alberti Pataviensis episcopi exinde secutis, necnon duo instrumenta publica de et super acceptacione et provisione dicte ecclesie sancti Martini in Prukka eidem Leutoldo virtute dictarum litterarum facta et per me notarium publicum infrascriptum propria mea manu conscripta et formata, quas in manu tenebat ipsasque coram venerabili viro domino Petro rectore cappelle sancti Petri in Wienna pro tunc officiali curie episcopalis Pataviensis subexecutore cum ista clausula: »Ceterum, cum ad executionem et cetera« a dicto domino episcopo Pataviensi executore principali subdelegato exhibuit et produxit, sibique domino officiali supradicto humiliter supplicando necnon sub penis in dictis processibus contentis eundem dominum officialem seriosius requirendo, quia ipse dominus . . officialis tamquam verus subexecutor virtute dictarum litterarum apostolicarum atque processuum eidem Leutoldo de dicta ecclesia parrochiali sancti Martini in Prukka cum omnibus sellempnitatibus canonice providisset, quatenus etiam vigore earundem litterarum apostolicarum atque processuum ipsum Leutoldum in corporalem possessionem eiusdem ecclesie sancti Martini in Prukka ducere curaret ac alia faceret et ordinaret que in et circa premissa necessaria essent et oportuna iuxta formam et tenorem processuum predictorum. Qui quidem dominus officialis supradictus se animo excusandi dixit et proposuit viva voce, quod propter plurimas atque diversas legittimas causas, quibus maxime esset occupatus, ac alia impedimenta racionabilia huius modi execucionis negocio mallatenus posset interesse neque in ipso procedere quoquo modo, quapropter eidem consuluit bona fide ut alium honestum virum seu subexecutorem ad huiusmodi execucionem requisitum haberet et invocaret, prout eciam de iure posset. Super quibus omnibus et singulis premissis Leutoldus antedictus sibi per me notarium publicum infrascriptum unum vel plura publica peciit confici instrumenta, omnium presencium testimonium invocando. Acta sunt hec Wienne dicte Pataviensis diocesis, in domo habitacionis domini Petri officialis supradicti, anno mense die hora indiccione et pontificatu, quibus supra, presentibus discretis [vi]ris^a domino Heinrico de Langtzend presbitero et Johanne Johannis de Polna clerico dicte Pataviensis et Pragensis diocesis testibus ad premissa vocatis pariter et rogatis.||
(S. N.)^b Et ego Nicolaus olim Chunradi de Ysenaco clericus Maguntinensis diocesis, imperiali publicus auctoritate notarius, quia litterarum apostolicarum atque processuum, de quibus supra, exhibicioni requisicioni excusacioni protestacioni necnon omnibus et singulis premissis, dum sic agerentur et fierent, una cum prenominatis testibus presens interfui eaque sic fieri vidi et audivi, ideo ad requisicionem dicti Leutoldi hoc presens publicum instrumentum propria manu mea conscribendo exinde confeci signoque meo solito et consueto signavi in testimonium premissorum.

Source Fulltext: LAMPEL, Urkunden Sanct Pölten (=FRA II, Wien 1901) S. 166-168