Wir Albrecht von gotes genaden herzog ze Osterreich ze Steir^a ze Kernden und ze Krain, grave ze Tyrol etc. tun chunt, das unser getrewer lieber Wolfgang von Wallse fur uns chome und gab uns auf die vischwaid auf der Traisen, die gen Ochsenburg gehort und die von uns ze lehen ist, und pat uns das wir die unserm getrewn Hansen dem Pusenkoph verleihen gerüchten, wann er im die mit der vest ze Ochsenburg verkauft hiet. Das haben wir getan und haben dieselben vischwaid dem vorgenanten Pusenkoph verlihen und leihen auch was wir im ze recht daran leihen sullen oder mugen, also das er und sein erben die selben vischwaid von uns, unserm lieben bruder herzog Lewpolt und von unsern erben innhaben und niessen sullen als lehens und landes recht ist. Mit urkund dicz brieves geben ze Wienn, an suntag nach gotes leichnams tag nach Kristi gepurd dreuzehenhundert jar darnach in dem siben und sibenzigisten jare. Dominus dux.

Source Fulltext: LAMPEL, Urkunden Sanct Pölten (=FRA II, Wien 1901) S. 193