Ich Stephan, ich Chu^enrat und ich Fridreich gepru^eder von Hohenberkch und all unser erben wir vergehen und tu^en künt offenlich mit dem brief allen den di in sehent hörent oder lesent, di nu lebent und hernach chünftig sind, daz wir mit wol bedachtem mu^et, zu der zeit do wir es mit recht wol getün machten und nach rat unserr nachstn und pesten frewnt recht und redlich verchauft haben unsers rechten ledigen frein aigens di gült und güter als hernach geschriben stet: von erst ainen hof gelegen dacz Jaüttendorf, da zu den zeiten Symon Mênolt auf gesezzen ist, davon man jerlich di^ent virzig meczen khorn und virzig meczen habern wilhalmspurger mazze, und darnach daz gut dacz Zwainhöfen, da auch zu der zeit auf siczet Janns, davon man jerlich an sand Michels tag ain phunt wiennêr phenning dient, daz alles gelegen ist in Chappellër pharr, mit alle di und dar zu gehört ze veld und ze dorf, gestift und ungestift, versucht und unversu^echt, mit allen ern nüczen und rechten als wir daz unversprochenlich in aigens gewer an alle eribvogtei inngehabt und herpracht haben, umb drei und vierzig phunt wienner phenning, der wir gar und genzlich verricht und gewert sein, dem erbern herren hern Fridreichen dem Pokchfüz² khorherren ze Sandpölten und demselben goczhaüs fu^erbas allen irn frum damit schaffen verchaüfen verseczen machen und geben wem si wellen an allen chrieg und irsal. Und zu ainer^a pezzern sicherhait seczen wir uns ich obgenanter Stephan, ich Chünrat und ich Fridreich gepruder von Hohenberkch und all unser erben den vorgenanten hern Fridreichen dem Pokchfüz und dem goczhaus ze Sandpölten der egenanten gült und guter ze rechten gewern und scherm fu^er all ansprach als freins aigens und des landes recht ist in Ôsterreich. Get in aber daran icht ab mit recht oder ob si mit recht icht chrieg oder ansprach daran gewunnen, von wem daz wër, daz süllen wir in alles ausrichten und genzlich widerchern an allen irn schaden und sullen si daz haben dacz uns und auf allen den gütern di wir haben oder noch gewinnen in dem lande ze Ôsterreich oder swo wir di haben und des davon bechommen, wir sein lebentig oder tode. Und des ze urchund so geben wir in den brief besigelten mit unsern drin insigln;³ und der sach ist gezeug Lienhart^b von Hohenberkch unser vetter mit seinem insigl.⁴ Geben an sampztag nach sand Michels tag, nach Christi gepürde dreuzehen hundert jar und in dem acht und sibenzkistem jare.

Source Fulltext: LAMPEL, Urkunden Sanct Pölten (=FRA II, Wien 1901) S. 212-214