Ich Öffer der Orberger und all mein erben vergehen und tu^en kund offenlich mit dem brief allen den di in sechent, horent oder lesent, di nu lebent und hernach chunftig sind, das wir mit wolbedachtem müt und nach rat unser nachsten und pesten frewnt, zu der zeit do wir es mit recht wolgetuen machten, recht und redlichen verchauft haben unsers rechten aigen den hof gelegen ze Chresenperg in der pharr ze Chasten mit aller zugehorung und darzu siben phunt und funfzig phenning alles wienner phenning gelts, di gelegen sind da selbs ze Chresenperg im werd und an dem Ho^echenperg oder wo di gelegen sind auf den nachgeschriben behausten gütern gestifter holden und auf uberlende, das man jerlich in den selben hof gen Chresenperg^a gedint hat: von erst Lewtel amman ze Cresenperg von zwain hofsteten vierzehen schilling und zehn phenning,² Kunrat daselbs von zwain hofsteten vierzehen schilling phenning,³ Hainreich Smälczl im werd von ainer müll zwelif schilling phenning,⁴ Elspet di paderin von der padstuben daselbs ain halbs phunt phenning, Ortolf auf dem mülgraben von ainer hofstat dreissig phenning und Göschel schuster daselbs von ainer hofstat dreizzich phenning, di man jerlich dint an sand Michels tag und sand Gorgen tag; darnach von dem uberlend an dem Hahnperg: Leutel amman von Chresnperg von vier tagwerch wismad zwen und dreizzich phenning und von zwain tagwerch wismad dreizzich phenning,⁵ Örtl auf dem mülgrabem im werd von ainem akcher zehen phenning, Peter am Prawnsperg von funf tagwerch wismad funfundvierzig phenning, Hainreich Lieler von Stainepruk von zwain tagwerch wismad sechzehen phenning,⁶ Seydel im Lielech von zwain tagwerch wismad sechzehen phenning,⁷ Wolfel am Schernperg von drin tagwerch wismad zwainzich phenning das man dint an sand Michels tag,⁸ Paul mulnër von dem Dörfflein von vier tagwerch wismad vierzig phenning,⁹ Fridreich von Stozzing von zwain tagwerch wismad ächt phenning,¹⁰ Chunrat Mulnär von Dorfflein von zwain tagwerch wismad acht phenning¹¹ und Simon der Fleischakcher im Werd von ainem akcher zehen phenning¹² daz man dint an sand Gorgentag. Und darzu haben wir verkauft den zehent ze Mitterfeld und im Dorflein, grozzen zehent und klainen zehent, der auch gelegen ist in Chastner pharr oder wo der gelegen ist, versucht und unversucht, mit aller seiner zugehorung ze veld^b und ze dorf, gestift und ungestift, nichts daran ausgenomen, der lehen ist von unserem genedigen herrn dem pischof ze Passaw, denselben zehent und den vorgenanten hoff ze Chresenperg mit aller zugehorung, es sei paw waid wismad holcz werd aw, wie das genant ist, mit sampt den obgenanten gutern und gulten ze veld und ze dorf und di vorgenanten zehent, gestift und ungestift, versucht und unverschucht, mit allen eren nuczen und rechten nichtes daran ausgenomen das gelegen ist in^c der egenanten pharr ze Kasten oder in welchen pharren das gelegen ist, daz zu dem egenanten hof gutern gulten und zehent gehort, und alles das daz wir daselbs um Kasten gehabt haben, als wir das alles und her Kunrat selig der Orberger mein vater in nucz und in gwer an al eribvogtey in aigens und lechens rechten und gewer innegehabt und her pracht haben und als das alles von alter herkomen ist an all auszug, denn ausgenomen des marichfuter das auf den behausten und gestiften gueteren leit, also haben wir daz alles verchauft und geben an all eribvogtey in den vorgenanten rechten den erwirdigen geistlichen herrn herrn Gerungen probst und dem convent gemaindlichen des gozhaus ze Sandpolten demselben gotzhaus und allen iren nachkomen daselbs umb zwai hundert phunt und umb vierzig phunt wienner phenning der wir ze rechten tegen und an all scheden von in gericht und gewert sein, in der beschaidenhait das si und das obgenant ir gotzhaus ze Sandpolten mit dem vorgenanten hof ze Cresenperg mit seiner zugehorung, mit den egenanten gutern und gulten und mit dem oftgenanten zehent und mit aller zugehorung so oben benant ist, allen irn frum schaffen sullen und mogen verkaufen verseczn und geben wem si wellen, an allen krieg und irsal, und ze pezzerr sicherhait so seczen wir uns den obgenanten herrn ze Sant Polten dem selbn irem goczhaus und^d allen iren nachkomen der vorgenanten guter und gulten aller nichtes darinne ausgenomen mit aller zugehorung, ze rechten geweren und scherm fur all ansprach aigen als aigens recht ist, lehen als lehens recht ist und des landes recht ze Osterreich. Wer aber das in daran icht abgieng mit recht oder ob si mit recht icht krieg oder ansprach darin gewunnen, von wem daz wëre; daz sullen wir in alles gänzlichen ausrichten und auch widerchern an allen iren schaden und müe und sullen si daz haben daz uns unverschaidenlich und auf all den gütern eribgütern oder varund güeter wie die genant oder swo di gelegen sind, di wir iczund haben oder noch chunftikliche gewinnen in dem lande ze Osterreich oder wo wir die haben wir sein lebentig oder tod. Und das der chauf also stet und unzebrochen beleibe, so gib ich obgenanter Offer der Orberger¹³ und all mein erben den obgenanten herrn ze Sandpolten demselben irm goczhaus und allen iren nachkomen daselbs den brief besiglten mit meinem angehangen insigl. Und der sach sind gezeugen herr Kristan der Zinczendorffer unser swager, her Hanns der Mainberger unser öhaim, und Fridreich der Hahenberger unser swager, auch mit iren angehangen insiglen die wir vleizzichleich gepeten haben, das si der sach geczeugn sind mit iren insigln. Geben an sand Johans tag ze sunbenten, nach Christi gepurd dreuzehenhundert jar und darnach in dem neunzigistem^e jar.

Source Fulltext: LAMPEL, Urkunden Sanct Pölten (=FRA II, Wien 1901) S. 321-324