Ich Magdalena Cunrats salig des ammans wittib von Gantzendarf vergich fur mich und all mein erben offenlich mit dem brief allen den die inn sechent, hörent oder lesent, die nu lebent und hernach khinftig sint, das wir recht und redlich, zu der zeit da wi^er es wol gethun mochten, ledigclich gegeben haben und geben mit dem brief den erwirdigen geistlichen herren, herrn Gerungen brobst und dem convent des gotshaus Sand Pelten und iren nachkhomen, alles das guet, es sein hofstet akher wißmad waid holz aw erb oder varund guet, nichts außgenomen, das ich egenante Magdalena und der vorgenent Cunrat zu einander bracht oder miteinander erarbait haben, das mier derselb mein wirt lassen hat, also beschaidenlich das mier die egenenten herren ze Sand Polten nach iren trewen ein phrient geben sollen unz^a an meinem tod und sollen auch si und ir gotshaus ze Sand Pölten mit dem obgenanten guet allen iren frum schaffen, verkhauffen versetzen und geben wem si wellen on all mein widerred und irrung als mit all andern iren guetern, und verzeich mich auch und mein erben^b derselben gueter ganz und gar, wan mich der obgenenten phrund wol darfur geniegt. Wär aber das ich in oder mein erben an den obgenanten guetern oder ander leut von unsern wegen khrig invell thätn, wie sich das fieget, das sollen wi^er inn außrichten und sollen si das haben datz mier und auf all mein erben und darzu auf all dem guet das wi^er haben, wir sein lembtig oder tod. Und wen auch das ist das ich obgenante Magdalena abgeen mit dem tod, so sollen si der obgenent phrunt ledig sein hinz allen mein erben, und sollen bei egenanten guetern pleiben in der maß als vor geschriben stet. Mit urchund des briefs den ich obgenante Magdalena und mein erben den obgenanten herrn zu Sand Pölten, irem gotshaus und allen iren nachkhomen daselbs besigelten geben mit der erwern Hansen des Meylauer und Hansen des Pomer zwair insigl, die wi^er vleizzig darumb gepeten haben, in peden on schaden darunder ich mich fur mich und all mein erben mit meinen treuen verpinde alles das ganzlich stat ze haben das vor an den brief geschriben stet, der geben ist am sambztag vor sant Tiburti tag,² nach Christi gepurd 1392^ten jar.

Source Fulltext: LAMPEL, Urkunden Sanct Pölten (=FRA II, Wien 1901) S. 345-346