Bonifacius episcopus^a servus servorum dei dilectis filiis preposito et conventui monasterii sancti Ypoliti, per prepositum soliti gubernari, ordinis sancti Augustini, Pataviensis diocesis, salutem et apostolicam benediccionem. Digna exaudicione vota personarum humilium maxime divinis laudibus sacreque religionis observancie deditarum apostolico nos convenit favore prosequi et ipsarum necessitatibus occurrere provisionis gracia congruentis. Exhibita siquidem nobis nuper pro parte vestra peticio continebat, quod olim bone memorie Albertus episcopus Pataviensis ad hoc dilectorum filiorum capituli Pataviensis accedente cons[ensu]^b parrochialem ecclesiam in Prukcha super Leyta Pataviensis diocesis ex certis racionabilibus causis auctoritate ordi[naria]^b perpetuo incorporavit annexuit^c et univit vobisque concessit, quod eandem ecclesiam et curam animarum dictor[um]^d filiorum parrochianorum eiusdem ecclesie per ydoneos canonicos dicti monasterii pro tempore possetis fa[cere]^d gubernari quodque vos vigore unionis et concessionis predictarum corporalem possessionem eiusdem ecclesie [assecuti],^d illam ex tunc in usus vestros tenuistis et possedistis. prout tenetis et possidetes pacifice et quiete, ac [quod eandem]^d ecclesiam per huiusmodi canonicos eiusdem monasterii pro tempore fecistis et facitis regi et curam huiusmodi exerceri. Cum autem sicut eadem peticio subiungebat, vos dubitetis incorporacionem et concessionem predictas ex certis causis iuribus non subsistere, et propterea timeatis vos super eadem ecclesia occasione incorporacionis et concessionis predictarum posse imposterum molestari, pro parte vestra fuit nobis humiliter suplicatum, ut eandem ecclesiam, cuius triginta, eidem monasterio, cuius ducentarum marcharum argenti fructus redditus et proventus secundum communem extimacionem valorem annuum ut asseritis non excedunt, imperpetuum incorporare annectere et unire nec non quod huiusmodi parrochialem ecclesiam per ydoneos canonicos eiusdem monasterii pro tempore regi facere possitis, vobis concedere de speciali gracia dignaremur. Nos igitur, volentes vos favore prosequi gracie specialis‚ huiusmodi vestris in hac parte suplicacionibus inclinati predictam parrochialem ecclesiam cum omnibus iuribus et pertinenciis suis vobis et eidem monasterio auctoritate apostolica perpetuo incorporamus annectimus et unimus, ita quod liceat vobis corporalem possessionem parrochialis ecclesie iuriumque et pertinenciarum predictorum auctoritate propria apprehendere et nancisci ac eciam perpetuo in huiusmodi usus vestros retinere omnesque fructus redditus et proventus parrochialis ecclesie^e in supportacionem onerum predictorum convertere ac eciam deputare possitis, diocesani loci et cuiuslibet alterius licencia vel assensu super hoc minime requisitis, ita tamen quod per canonicos dicti monasterii in prefata ecclesia faciatis^f laudabiliter deserviri et animarum cura dicte ecclesie diligenter exerceatur et eciam gubernetur, solitusque in ea ministrorum numerus nullatenus minuatur, iuraque episcopalia persolvatis et supportetis ipsius ecclesie onera consueta, non obstantibus constitucionibus et ordinacionibus apostolicis nec non statutis et consuetudinibus ordinis sancti Augustini et predicti monasterii quibuscunque contrariis iuramento, confirmacione apostolica vel quacunque firmitate alia roboratis‚ seu si aliqui super provisionibus sibi faciendis de parrochialibus ecclesiis aut aliis beneficiis ecclesiasticis^g in illis partibus speciales vel generales nostras vel predecessorum nostrorum Romanorum pontificum aut legatorum sedis apostolice litteras impetrarint, etiam si per eas ad inhibicionem reservacionem et decretum vel alias quomodolibet sit processum, quas quidem litteras et processus habitos per easdem ad predictam ecclesiam volumus non extendi, sed nullum per hoc eis quoad assecucionem parrochialium ecclesiarum aut beneficiorum aliorum preiudicium generari, et quibuslibet litteris indulgenciis et privilegiis apostolicis, generalibus vel specialibus, quorumcunque tenorum existant, per que presentibus non expressa vel totaliter non inserta effectus earum impediri valeat quomodolibet vel differri, et de quibus quorumque totis tenoribus de verbo ad verbum haberi debeat in nostris litteris mencio specialis. Nos enim ex nunc irritum decernimus et inane, si secus super hiis a quoquam quavis auctoritate scienter vel ignoranter contigerit attemptari. Nulli ergo omnino hominum liceat hanc paginam nostre incorporacionis annectionis unionis constitucionis et voluntatis infringere vel ei ausu temerario contraire. Si quis autem hoc attemptare presumpserit, indignacionem omnipotentis dei^h et beatorum Petri et Pauli apostolorum eius se noverit incursurum. Datum Rome. apud Sanctum Petrum, XV. kal. junii, pontificatus nostri anno quinto.||
Pro P. de Bosco V. Boninc m. p.

Source Fulltext: LAMPEL, Urkunden Sanct Pölten (=FRA II, Wien 1901) S. 362-364