Wir Ofka, von gotis gnadin herczoginne czur Olsin, vnd wir Conrad, von den selbin gotis gnadin herczog von Slesien, herre czur Olsin vnd czur Kozil, bekennen offinlich an desim briue allen, di en zehin adir horin lezin, daz vor vns komen ist vnsir liebir getruwir Herman Spigil vnd hat mit gutem willen offinlichin bekant, daz die ratmanne vnd di stat czu Breczlaw mit em eynen sulchin kouff, alz hy noch geschrebin stet, vm vomfczig mark, de sy em gereit beczalit han, rechtlichin vnd redelichin gekouft vnd gemachit habin also, daz her den selbin breczlawern sal gebin czwisschin hy vnd den nestin wynachtin vor czwenczig mark kalk, yczlich hundirt vnd sechs czobir kalkis vor eylf vir- dunge, vnd denne von den selbin wynachtin bynnen sechs iaren sal her en alle iar antworten vumf twsint czobir kalkis, y das hundert vnd sechs czobir vor eylf virdunge, alzo vorne geschrebin ist, vnd in den erstin dryen iaren sullin sy em abeslon an den ubrigen drysik marken alle iar czen mark. Wurde her ouch icht ubriges kalkis czu verkeufin habin, den sal her en ouch gebin in dem sel bin koufe bis alzo lange, daz di sechs iar vsqwemen, so wirt her denne von en ledig vnd los, vnd was her en kalkis verkeufit noch deme, alz si em das vorgeschrebene gelt gar abegeslon ynnewenik der vorgesprochin czyt, den sullen si em abegeldin also selbist, y das hundert vnd sechs czobir vor eylf virdunge, das allis also vorgeschrebin ist, hat her en globt czu haldin vnd czu antwertin by allem syme gute, das her yme vndir vns hat; des hab wir Ofka vnd Conrad durch syner bete wille di vorgeschrebene syne globde uff alle syn gut vnd uff en, daz her adir syne erbin vnd nochkomlinge di selbin globde stete vnd gancz haldin sullin, by alle syme gute, mit desim briue bestetiget vnd vnsern willen dorczu gegebin. Geschen vnd gegebin ist der briff czu Trebnicz an dem donrs- tage noch den pfingistheiligen tagin noch crists geburt dryczenhundert in dem nwn vnd sechczigstin iare vndir vnsir ingesigel.