Vy Eric hertoghe van Sassen de junghere, Johan, Henric, Clawes vnde Gherd greuen to Holzsten. Bekennen vnde betughen openbare in desser scrift, dat wi deghedinget || hebben mit den beschedenen mannen, den ratmannen der stat to Lubeke, vnde se mit vs enen lantvrede to holdende in desser wys: To dem ersten male, dat neman na || desseme daghe rouen, bernen eder en den andern van seal binnen vsen landen ane der heren orloghe, vnde en jewelk vser man seal sik noghen laten an rechte vor sijjneme heren. We sik dar an nicht wolde laten neghen, vnde dar embouen rouede, brande eder en den andern venghe in vsen landen, in welk eres vser lande dat schude, eder deme de schade schude, denie schole wi andern alle volghen mit vsen banneren, wi Eric hertoghe to Sassen mit drittich mannen mit helmen vnde dertich mannen wapent, Johan greue to Holzsten mit dertich mannen mit helmen vnde dertich mannen wapent, Henric vnde Clawes greuen to Holzsten mit dertich mannen mit helmen vnde dertich mannen wapent, vnde Gherd greue to Holzsten mit teyn mannen mit helmen vnde mit teynen wapent Vortmer de van Lubeke scolen volghen mit veftich mannen wapent vnde mit teyn schütten in den landen to Raceborgh vnde to Holzsten, wor des not is. vnde mit ener bliden mit eneme driuenden werke vnde mit eneme werkmestere van erer stat

ouer achte mile, vnde nicht vorder. Vortmer wil greue Alf van Schowemborgh in desseme lantvrede vvesen, so seal he volghen mit teyn mannen mit helmen vnde mit teynen wapent. Vnde willet de van Hamborgh dar inne wesen, so scholen se volghen mit dertich mannen wapent vnde mit teyn schütten in den vorbenomeden landen, wor des not is, vnde mit ener bliden mit eneme driuenden werke vnde mit eneme werkmestere, van erer stat ouer achte mile, vnde nicht vorder. Vnde en iewelk vppe sine eghenen kost, win vnde vurlust na mantalen. Oft des not were, so seal en iewe(l)k volghen noch enes also stark, alse hir vore screuen is. Were ok dat des groter not were, malk seal volghen mit aller macht. Vnde were dat vser heren welk nicht to lande were, so schal men vsen ambet luden to spreken vmme desse volghe, de scholen se don van vser weghene. Desse volghe seal men don binnen den landen to Raceborgh, to Sadelbendingen, to Holzsten vnde to Stor- mern. Vortmer were dat vser ienich, de in desseme lantvrede sin, in vsen landen voruanghen worden vte den landen to Zwerin vnde to Wittemborgh, in de lant scole wi volghen mit alsodaner volghe, alse hir vore screuen is, vnde weder don dat vppe de heren vnde vppe de lant, dar it vs vt gesehen is. Vortmer we de misdedere houede, husede eder spisede, de seal like sculdich wesen, it enwere also dat he des nicht enwiste, dat se vûruestet weren, des mach he vnsculdich werden sylf twelfte vser vmberuchteden man vppen hilghen. Vortmer were dat ienich man vmme rof, brant vnde venknisse eder vmme andere misdat voruestet worde in vser enes lande eder in der stede ienich, de seal vûruestet wesen in vser aller landen vnde in den steden. Mer de stede mit eren vuruesteden luden, de er desser tyt vûruestet weren, vnde mit eren helpern, dar scolen se dat mede holden, alse se alsus langhe dan heben, vnde ok mit vsen vuruesteden luden, de er desser tyt vûruestet sin, scolen it de stede holden, alse se vore deden. Ok nen vser heren vorbenomet ofte en ander man seal de misdedere vppe der heren daghe voren quemen se auer dar, so scolen se nenes leydesneten: wolde dat ienich man weren de seal like sculdich wesen. Vortmer were dat rof eder brant eder vengnisse in vser lande en seude, dar vluchtighes votes volghet worde, in welk vser lant de rof dreuen worde eder vanghenen to voret worden, dar se inne bleuen, worde wi dar to laden eder vsen vogheden kundeghet, dar schole wi vnd alle de vse vol ghen vor de veste vnde scolen dar vore bliuen. Welk vser mer dar to gheladen worde, de seal volghen binnen ver daghen, alse hir vore schreuen is, vnde wert de veste ghewunnen, de seal men breken, ane der heren slote, de en oldinghes to hört hebben. Vortmer were dat ienich borghere van den vorbenomeden steden Lubeke vnde Hamborgh eder ienich kopman in vsen landen dot gheslaghen worde Bd.п. 107

de dat dede, den scole wi vûruesten vnde scolen dar vmme volghen in allen stucken, alse vmme rof, brant eder vengnisse. Were ok dat der van Lubeke borgher welk ofte knechte welken bederuen man in vsen landen dot sloghe, des Got nicht enwille, dar scolen se ouer richten, ofte men en claghet, alse ere lubesche recht to secht. Mer were dat se sloghen ere vûruesteden lude eder rouere eder de ghene, de en helpe don wolden eder deden mit husende eder mit spisende eder anders jenegher- leye wys, dar scolen se ane wesen sunder broke. Vollmer were dat ienich man vmme misdat ghesculdeghet worde, de dessen lantvrede rorde, des he vûrsoke, des mochte he vnsculdich werden sylf twelfte vser vmberuchteden man vppen hilghen. Were auer dat it mannen in den landen vnde steden witlik were, dar scole wi vp volghen, alse desse lantvrede to secht. Vortmer were vser heren ienich, de siner manne ieneghen vurunrechtede na desser tyt, den scole wi andern heren mit den ratmannen van den steden berichten vnde scolen des macht hebben, dat he ene bi rechte late na deme rechte, dar he an beseten is. Vortmer desse lantvrede seal stan dre jar na desseme daghe. Vnde were dat ienich stucke eder veyde hir van vpstunde, des scole wi alle mit den steden een bliuen vnde vser nen seal sik daghen eder sonen, wi en hebben der stucke enen gantzen ende. Vnde mit dessen deghedingen scolen nenerleye vryheyt, breue eder hantuesten broken wesen eder in ieneghen stucken vùrerghert. Vor alle desse vorbescreuenen stucke vast to holdende sunder ienegherleye arghelist, so hebbe wi den vorbeno- meden ratmannen vnde vser en iewelk dem andern louet mit hand vnde mit munde bi vsen truwen vnde mit vs vse truwen man, alse van hertoghen Erikes weghene her Egghert van Crummesse vnde Hartwich Tzabel, van greue Johannes weghene her Johan van Rickelkestorpe vnde her Hartwich van Rantzowe, van greue Hen- rikes vnde greues Clawes weghene Dethlef Wensine van Goleuitze vnde Otte Wensine, vnde van greue Gherdes weghene Henric Glusing vnde Cort Metzeke. Vnde to ener opembaren betughinge sint vser aller ingheseghele mit vser mede- louere ingheseghelen ghehenget to dessem breue. Ghedeghedinghet vnde ghe- gheuen to Lubeke, na Godes bort dusent iar drehundert iar in deme neghen vnde verteghesten iare, des ersten Sundaghes in der Vasten.

iïach dem Originale, auf der Trese. mit zwölf wohl erhaltenen Siegeln; das dreizehnte (de» Otto H'ensin. No. // in der Reihenfolge) ist vom Siegelbandc abgesprungen.