Ich ians von chappell vergich vnd tuen chunt allen den, di lemtig sind oder her nach lemtig schu^ellen werden, daz ich mit verdachtem muet vnd nach rat meiner getreven vuraint daz guet, daz meinhart der purger von du^enpach vnd sein erben habent gehabt von mir ze rechtem lehen, vnd leit daz selbe guet in walthauser pharr vnd ist genant in dem stainoech vnd an dem lehen vnd daz soedmich holtz, daz zv den vorgenanten hueben auch geho^ert, vnd daz selbe guet ist mein rechtez aigen gewesen von allen meinen vodern; di selben aigenschaft han ich mit guetlichem willen auf gegeben dem erbaern herren probst Gerung vnd seinem Gotshavs datz walthausen durch got vnd durch gehu^egnu^esse aller meiner vodern und durch pezzerer sicherhait , daz vuerwaz alle mein erben vmbe di vorgenanten aigenschaft mit dem vorgenanten herren probst Gervng vnd mit seinem gotshaus datz walthausen dehainen chriech noch dehainen streit schu^ellen haben, dar vmbe gib ich dem vorgenanten gotshaus datz walthausen mein prief versigelt mit meinem insigel vnd sind der sache vnd der red gezeug di erbaern herren vnd di vurumen leut, di hie geschriben sind an dem prief: her hauch von reichenstain, her alber von volchenstorf, her vlrich von gru^eenpurch, her marichhart von Osterwerch, her hainrich von O^ede, her marichhart sein prueder, her hoertneid von chulib, her vureitel von winthag, her hainrich der sweinpech, hainrich von ymzing, vlrich der hauser, herweich der holtzer vnd ander gar erbaer leut, di da pei sind gewesen, daz ich ians von chappell di vuederung vnd di guet mit rechten treven han getan dem vorgenanten gotshaus datz walthausen vnd ist der prief gegeben, do von christes gepuerd waren tausent iar, drevhundert iar, da nach in dem fv^emfzehenten iar an sand Katerein tag datz steirekk in der purch.

Source Fulltext: OÖUB 5 (Wien 1868) S. 154-155, Nr. 157