ICH Chunrat der Mitterberger vnd ich Leutolt sein pru^eder Vnd ich Anna sin housfrowe vnd vnser paider Erben wier veriehen vnd tu^en chunt allen den, di disen Brief lesent oder ho^erent lesen, daz wier mit verdachtem mu^et vnd mit gu^etlichem willen aller vnser paider Erben durch vnserr selhail willen vnd auch durch vnserr vodern se willen geben haben den Erbern herren dem Conuent ze Walthausen ein halb phunt gûld wienner phening auf der hofstat an dem Anger, di in Erbinger pharr leit vnd di vnser rechtz freys aigen gewesen ist, Also beschaidenlich, Daz wier vnd vnser Erben oder swer di vorgenanten hofstat innehat, den vorgenanten geistlichen herren ze Waldhausen alle iar an vnserr vrowen tag zder lichtmesse ein halb phunt wienner phenning dienen sullen so lang, vntz daz wier oder vnser Erben oder wer di oftgenanten hofstat innehat, der sol (sic) den vorgenanten herren chauffen ein halb phunt gûld wienner phenning, daz ewig sei, oder fûmf phunt wienner phenning geben, daz si selben chauffen ein halb phunt phenning gûld, daz ewig sei. Wêr aber daz, daz wier oder swer di vorgenanten hofstat innehat, den geistlichen herren ze Waldhausen daz halb phund gûld vertzugen vnd nicht dienten, als vor geschriben stat, so sol di oft genant hofstat mit vnserm gu^etlichen willen in veruallen sein Also, daz si fu^erbaz an allen chrieg vnd an allen ierrsal sullen schaffen allen iern frum damit, verchauffen, vnd versetzen vnd geben, wem si wellent, in dem recht, als wier sey zu rechtem freyn aigen gehabt haben. Vnd daz diseu sach vnd diseu gelûb fu^erbaz vnzebrochen vnd stêt beleib, so geb wier disen Brief zu einem ewigen getzeug versigelten mit vnser paider jnsigel. Diser Brief ist geben Anno domini M°. CCC°. XXXV. Inuocauit.

Source Fulltext: OÖUB 6 (Wien 1972) S. 149, Nr. 142