ICH Eberhart der Stuerm und ich Wendelmut sein hausfrowe und unser paider erben wier verjehen, daz wir mit unsers perchmaister hant Jacobs des alten Sluzzler su^en die zeit statrichter ze Newnburch chlo^esterhalben und auch amptman der erbern geistleichen herren van Pawngartenperge recht und redleich verchauft und hingeben haben unsern weingarten, des ain sechstail eins jeuchs ist und leit in dem Wolfgraben zena^echst der erbern geistleihen cha^erherren weingarten van Walthawsen, do man alle jar van dient den egenanten geistleihen herren van Pawmgartenperg perchrecht und voytrecht als daz mit alter hercho^emen ist und der mich varbenanten Wendelmu^eten anerstarben ist van meinem rechten o^echaym Albrechtem dem Vo^egelein dem Got genade, und ist auch mir derselbig weingarten mit rechtem laz und mit fu^erczicht angevallen an rechter taylung und als mein tailprief sagt, den selben varbenanten weingarten haben wir mit rechter fu^erczicht verchauft und hingeben mit alle dem nucze und rechten als da mit alten rechten hercho^emen ist umb a^echt phunt wienner phenninge der wier gar und gaenczleich verricht und gewert sein ze rechten tagen, den erbern geistleichen charherren dem ganczen convent des chlo^esters ze Walthawsen und allen iern no^echcho^emen. Und durich pezzer sicherhait so seczen und verpinden wier uns ich obgenanter Eberhart der Stuerm ich Wendelmuet sein hausfrowe mitsampt unsern erben uber den egeschriben weingarten den egenanten geistleiehen charherren und dem ganczen convent des chlosters ze Walthawsen und allen ierr nachcho^emen ze rechten gwer und scherm fu^er alle ansprach nach des landes recht in O^esterreich. Waer aber daz si fu^erbaz dhainerlay ansprach oder chrieg an dem oftgenanten weingarten icht gewunnen oder ob in fu^erbaz mit recht daran icht abget, und waz si des schaden nement das sullen wir in alles awsrichten. Und daz der chauf und der scherm furbaz ewichleich also stet gancz und unczebrochen weleib und wenne wier selber nicht aygen insigil enhaben, daruber so geben wier in den prief ze einem warn sichtigen u^erchunde der sach versigilt mit unsers perchmaister insigil Jacobs des alten Sluzzler sun die zeit statrichter ze Neuwnburch chloster halben und amptman der erbern geistleiehen herren van Pawmgartenperge, und mit des erbern manne insigil Ulreichs van Zwetel die zeit schaffer in der erbern charherren spitol. Der prief ist geben nach Christes gepu^erde drewczehen hundert jar darnach in dem ayns und sybenczigisten jar an sande Jorigen tage.

Source Fulltext: OÖUB 8 (Wien 1883) S. 524f., Nr. 530