Ich Eberhart von Kappellen bekenn vnd tun kunt offenlich an dem brief vmb den drittail zehent auf den häwsern hernach geschriben; von erst auf dem Eberharts hof auf einer hofstat, die in denselben hof gehört, auf dem Gusterhof, auf dem Kagra vnd auf dem Eysenperig, alles gelegen in Walthauser pharr, den Niklas der Tessenperiger von mir ze lehen hat, hab ich demselben Tessenperiger di gnad getan, ob das wär, das er vor seiner hausfrawn Agnesen mit dem tod abgieng, das dann das egenant drittail zehent auf den egenanten häusern seiner hausfrawn Angnesen lehen von mir sein sol vnd auch das vntzt an irn tod innhaben sol nutzen vnd nyessen, als lehens vnd landes recht ist in Österreich. Mit vrkund des brieffs versigelten mit meinem anhangendem insigel geben an Mitichen vor sand Gregorientag, da man czalt von Kristi geburd dreuczehen hundert jar darnach in dem acht vnd newnczkisten jare.

Source Fulltext: OÖUB 11 (Wien 1983) S. 682