Ich schwester Pazze di priorin und wir schwestern alle ze Münebach tuen chunt allen den, di disen brief ansehent oder hörent lesen baide, die nu lebent oder hernach chunftig sint, daz wir gemeinleichen mit gueten willen und auch mit rat bruder Bernhardes dez prior und der andern brüder ze Chrems dem ersamen hern abt Christianen und seiner samenung ze Engelcelle verchaufet haben unsers freien aigens ze Charnern, daz geachtet ist auf vierdhalb phund pheninch gelt, und ze Neundorf und ze Radendorf auf herbergen und auf paumgarten und auf weingarten drezzich und vier phunt pheninch gelten, besucht und unbesucht um sechs und achzig phunt phening wienner munz und derselbig phening sei wir gewert und geloben den vorgenanten hern und seiner samenunge die vorgenante gulte ze schermen nach des landes recht, also ob in selben gulte mit recht icht an behabt wird, der wir nicht verantworten und geschermen mochten, so schol wir in mit als vil rechter gulte unseres aigens, daz wir anders wo haben, iren schaden widerlegen. Und ze ainer ewigen bestetichait dizes chaufes und dez gelubdes geb wir in disen offen brief daran hangent unsern insigel. Dez sint auch gezeuge abt Eber von Zwettel und techent Gotfrid ze Chrembs und der vorgenant brueder Bernhart der prior und bruder Dominich von Chrems etc. etc. Daz ist geschehen ze Minnebach von Christes burd in dem dreuzehenhundertisten iar an den erbrn Wethe tach (? Betetag, Bittage, Ebeweihtage d. i. 6. Jänner).

Source Fulltext: OÖUB 6 (Wien 1872), Nr. 27 (Anhang), S. 596