Ich Hartneid von Liechtenwinchel und mein hausfrawe Reichtze tuen chunt allen den, di disen brief sehent oder hörent lesen, daz wir dem apbt von Engelhartscelle und seiner sammunge ze lesen haben geben umbe zehen phunt pheninge (das gut zu Liechtenwinchel), wand daz vorgenant gut unser saz ist gebesen und ist dise losunge geschechen mit unser chind guteleichen willen. Und daz in daz unverchert peleibe, dar uber geb wir in disen prief mit unsern insigel versigelt und sint des gezeuge her Ulreich der pharrer von Everding, der Sighart Julbekche sein geselle und her Hartneid sein vetter und Hainrich von Harthaim und Rudolf der Schiver und Morichort von der Aschach und Ulreich von Geltingen und Elbel von Portzeheim und ander biderb leut, den iz wol chunt ist, und diser prief ist gegeben, da von Christes gepurt sint gewesen tausend iar und dreuhundert iar und in dem zweliften iar des Freitages vor sant Mathyas tag.

Source Fulltext: OÖUB 6 (Wien 1872), Nr. 52 (Anhang), S. 614