Wir Fridrich von gotsgnaden Römischer Chünch ze allen zeiten ein merer des Reichs. Tuen chvnt allen den di disen prief sehent oder hörent lesen, daz die erb(er)n geistlichen läwt der Apt von Jerus vnd der probst von Pernek¹ pei vns sint gewesen, vnd haben vns gezaiget ir hantvest vnd ir alten reht damit die Chlöster paiden sint gestiftet, die reht vnd ir hantvest wir gehört vnd gesehen haben, daz di rehte vnd redleich herchomen sind vnd bestaetigt sint mit vnserer vordern Insigeln, di also geschriebn stent: Wo si ir aygen guet füeren in allen vnsern lanten daz schöllen sie niht vermauten. So schöllen auch di herren von Jerus all wochen vier fueder holtzes nemen in der sazz an welhem tag si wollen. Vnd di vorgnantn herren von Jerus haben auch ein mul in der sazz, da gehört wismat zu von der pruke untz inderhalb der mul. So schöllen auch paider Chlöster holden nicht püezzen in daz lantgriht. Weder swertzuchen noch chainerlaye sache, nur die sache di auf den tot ziehent. Würd aber irre holden chainer diser sache ainer schuldich, vnd puezt er di ains, di schol er furbaz niemer gepuezzen. So sein wir auch ir obrister voyt vnd schöllen in ainen voyt geben nach ir gebet. Wir erlauben in auch zehen phunt gelts ze chouffen vnsers rechtn aygens. Di recht vnd all ir prief vnp hantvest di si habent von vns vnd von vnsern vodern, bestaetign wir mit vnserm chünyglichen gwalt an disem prief, daz di ewichlich maht vnd chraft habent. Vnd wer in di pricht, der geuellet in vnser Vngnad ewichlich. Diser prief ist geben ze Wienne, da von christs gepuerd waren ergangen Drevzehen hundert Jar, darnach in dem Siben vnd zwainzgisten Jar, an Sant Peter vnd Paulstag vnd in dem Drevzehenten Jar vnsers Reichs².

Source Fulltext: MAYER, Geras (= AÖG 2, 1849) S. 49-50, Nr. 38