Ich Katrei Petreins des Ratenmosaer witib jch Christ an vnd ich Alphart ier ped su^en wier veriehen offenbar mit dem prief vnd tu^en chund allen den die in sehent vnd ho^erent oder lesent die nu lebent vnd hernach chumftich sind, daz wier vnuerschaidenleich gelten schulln dem beschaiden mann Hainreichen dem Sneidaer vnd seiner hausfrowen Elspeten vnd iern erben tzwaintzich phunt alter wiennaer phenning die siu vns berait gelihen habent, vnd da hab wier in gesatzt vnser gu^ot daz diu Osterhu^ob ist genant, mit allen den nu^etz vnd dartzu^e geho^ernt versu^echt vnd vnuersu^echt, gestifft vnd vngestifft, tze holtzt vnd tze veld wie daz genant ist, vnd diu ouch lehen ist von vnserm genaedigem herrn hern Eberhartn von Waltse houbtman ob der Ens vnd mit herrn hant vnd mit aller staet also saettz recht habent, also beschaidenleich, daz in davon all jar geraicht schol werden vnd gedient an vnser vrowen tag tzu der dientzeit an dreizzich funfthalb phunt alter wiennaer phenning fu^er all varderumb. Der schol in geualln von iern phenning an dreizzig drithalb phunt alter wiennaer phenning vnd die v^oberigen tzwai phunt schullen seu vns abslahen alljaerleich an den tzwaintzich phunten, die weil wier von in nicht lo^esen mu^egen. Waer aber daz icht abgang auf der vargenanten hu^ob wu^ord, von welherlay sachh daz geschaech, daz siu den vargenanten dienst getragen maechtt, daz siu mit einer warhait geweisen mu^egen, daz selb schol vns abgen vnd seu schullen sein an ierm dienst nindert engelten an dehainn sachhen. Seu schullen auch stiften wann in des nat geschiecht, vnd sto^ern wann in der hold nicht fu^egt. Siu schulln vns oder hern Niclan vnd Thomann dem Haiden oder vnsern erben tze lo^esen geben all jar wann wier gelo^esen mu^egen an vnser vrowen tag tzu der liechtmiss var achtt tag vnd hinnach achtt tag tzu^e alln den rechtten als var geschriben stet an allz geuaer vnd an allz vertziehen. Wier sein ouch des satzz ier gewern wo in des nat vnd du^erft geschieht also landes recht ist ob der Ens. Daz in deu sachh staet vnd vnuerchert beleib darv^eber geb wier in den prief versigelt mit vnserr paider o^echaim jnsigel hern Niclas vnd Thomas der Haiden, wand wier aigener jnsigel nicht gehaben mu^egen, vnd verpinden vns ouch vnder der jnsigeln allez dez staet tzu behalten als var geschriben stet. Der brief ist geben nach Christes gepu^ord dreutzehen hundert jar darnach in dem sibenten vnd fumftzichistem jar an sant Agnesen tag.

Source Fulltext: OÖUB 7 (Wien 1876) S. 481f., Nr. 474