ICH Hainrich der Rytzzenwinchler und ich Peter sein pru^eder wir tu^on kunt, daz Avir haben ze chawffen geben den ersamen und wolbeschaiden und unsern genedigen vrowen zu Slyrwach vrowen vrowen vrow Katherinen ze den zeiten abatissin und dem covent daselbs unser mu^el ze Micheldorff gelegen in Chirichdorffer pharr, und dew selber mul ist unser rehtz lechen gewesen von unsern genedigen herrn herrn Dietrichen und von herrn Ru^edolfen den Losenstainern, und haben inz geben mit allen den rechten eren und nutzzen und darzu^o geha^ert mit der beschaiden, daz wir chain ansprach niht mer haben schullen nach der selben mu^ell. Daz unsern genedigen vrowen zu^o Slyrwach daz also sta^et gantz und unverchert beleib, daz loben wir in mit unsern trewen und geben in daruber den offen brief versygelten mit unser paider pru^eder anhangenden insygel, und zu^o ainer pezzer sycherhait der worhait mit der erbern la^ewt anhangenden insygel versygelten Weygcharten dez Pawrs ze den zeiten schaffer zu Pernstain und mit Thomans dez Haydens und mit Hermons dez Prawnspergers ze den zeiten lantrichter zu Slyrwach. Und daz ist geschehen, do mon zalt von Christi gepu^ert drewzehen hundert jar darnach in dem fu^enf und sechtzikosten jar an sant Thomons tag dez zweliffpoten.

Source Fulltext: OÖUB 8 (Wien 1883) S. 255f., Nr. 255