ICH Andre der Wiltperger vergich, daz ich ze chauffen gegeben han dem erbern ritter meim lieben o^ehaim hern Hainreichen dem Scho^ennawer und allen seinen erben den halben hof ze Nuzzpach mit chirchen mit mu^el mit vogtay mit hofsteten mit wydem mit wysmad und mit allen den eren rechten nutz/een di darzu^e geho^ernt und also mich daz allez von meim saeligen vater und auch von meinn geswistreden mit geleichem tail angevallen ist und daz auch mein vreizzs rittermaezziges aygen ist, und daz selb allez han ich in ze chauffen geben umb ain gelt des ich von in gantz und gar gericht und gewert pin also mit der beschaiden, ob daz waer daz ymant herfu^er chaem der pezzer erb wolt sein denn ich vorbenanter Andre der Wiltperger und mein erben oder denn her Hainreich der Scho^ennawer und sein erben, der schol in geben sechtzik phunt alter wyenner phenning. Waer aber daz der egenant mein o^ehaim her Hainrich der Scho^ennawer oder sein erben ichtes legten auf den vorgenanden halben hoff datz Nu^ezzpach oder waz dazu geho^ert wie so daz benant waer daz er oder seiner erben ainer pey seiner beschayden gesprechen mocht unberecht und an aid, daz selbe allez schol man in gantz und gar mitsamt den vorgenanten sechtzk phunt phenning ablegen und widercheren, und pin auch ich vorgenanter Andre der Wiltperger und mein erben des obgenanten halben hofs ze Nuzzpach und waz darzu geho^ert ir scherm und gewer fu^er alle ansprach ze hof und ze tayding wo in des not und durft geschicht nach landes recht ob der Ens, und setz ich seu des gaentzleich an nu^etz und an gewer mit dem offenn gegenburtigen brif. Daz in daz allez stet unverchert beleib daruber ze ainem warn urchunde der sachh aller gib ich in oftgenanter Andre der Wiltperger fu^er mich und mein erben den offenn brief versigelt mit meim anhangundem insigel, und ze einer pezzern staetichait der obgeschriben tayding versigelt und bevest mit der erbern ritter payder hern Ulreiches des Anhanger von Choppach und hern Andre des Hawnsperger und auch mit Ernstes des Otzstorffer zu der zeit richter datz Chremsmu^enster anhangunden insigeln. Der brif ist geben ze Chremsmu^enster do man zalt von Christi gepu^erd drewtzehen hundert jar und darnach in dem sechs und sechtzigistem jar an sand Gorgen tag.

Source Fulltext: OÖUB 8 (Wien 1883) S. 274f., Nr. 278