ICH Chunrat ze den zeiten mawtschreyber ze Wels Chunracz dez Schreyber sun weillen purger ze Wels dem Got gnad, und mitsampt mir all mein erben wir vergehen offenlichen mit dem prief, daz bir ze chauffen haben geben der erbern geystleichen vrawn vrawn Katrein ze den zeiten chelnerin ze Slirbach dez ordens zystercyensis unser wizz pei der Chrems gelegen in Warperiger pharr dew unser recht lechen gebesen ist von unserm gnaedigen herren von hern Eberharten von Walse, mit allen den nuczen dy darzu gehörnt und biers von alter ingehabt haben versu^echt und unversu^echt auz unser nucz und gewer in dy ieren nucz und gewer um ain gelt, dez bier gar und gancz von in verricht und gewert sein. Wier haben in auch dy vorverschriben wizz aufgeben mit herren hant und haben uns der fu^erczicht getan also, daz bir noch all unser erben fu^erbaz nach der vorverschryben wizz nymermer chain ansprach schullen haben weder mit recht noch an recht. Wier sein auch der vor verschriben wizz der egenanten vrawn Katrein und dez confenttz ze Slierba (sic) ier fu^erstant und ier recht gewer swo in dez not geschyecht als chaufs recht ist in dem lant ob der Ens. Wa^er daz in von uns an der gewerschaft icht abgieng da si schaden innaemen swye der schad genant waer, den selben schaden schullen bier in ablegen und widerchern mitsampt dem haupgu^et gancz und gar, und schullen si daz haben dacz uns und dacz unsern trewn und darzw auf aller unser hab dy bier haben oder noch gebin inner lancz oder auzzer lancz versu^echt und unversu^echt, und allez irez schadens mit¬sampt dem haupgu^et vo^ellichleich davon pecho^em mit unserm gu^etleichen willen wier sein lembptig oder tod. Daz in dy red fu^erbaz also staet und unverchert peleib, daruber ze aym sichtigen barn urchund der worhait geben bier in den prief wesigelt mit meins lyeben herren und auch vreunt Dytreichs dez jungen Haunolcz ze den zeiten gebaltiger statrichtter ze Wels anhangunden insigell, und mit dez erbern mans anhangunden insigell Otten dez Liechtmayster purger ze Wels, dy si ze ainer zeugnus der vor verschriben sach durch unser vleizzigen pet willen daran gelegt habent in payden an schaden, darunder ich mich egenantter Chu^enrat und all meyn erben verpinten mit unsern trewn an aydez stat allez daz staet ze haben daz vor verschriben ist, wan ich ze derselben zeitt aygens insigels nicht enhet. Der prief ist geben dez mitichens vor sand Jo^erigen tag do man zalt von Chrystez gepu^erd drewczehen hundert jar darnach in dem aecht und sechczkysten jar.

Source Fulltext: OÖUB 8 (Wien 1883) S. 374f., Nr. 381