Wier Katherina von Gotes genaden ze den zeiten abbatisnn zu Slyrwach dez ordens cysteriensis wier tu^en ku^ent und vergehen, daz swester Katherina ze den zeiten chellerin zu Slyrwach chawft hat ein wizzen von Chunraten ze den zeiten mawtschreiber zu Wels, und dew selber wizz ist gelegen in Wartperger pharr und ist lechen gewesen von unserm gnedigen herren und stiffter u^ensers goczhaus von herrn Ewerharten von Waltse, und die selben wizz hat sew geben und gemacht mit irem gu^etlichen willen und ze den zeiten do sey ez wol getun mocht dem covent ze Slyrwach in die pitantij, und hat daz than durch hail und saelichait u^enser genedigen vrowen vrowen Annen saeligen unsers stiffters hawsfrawen von Lo^esenstain und auch durch ir selhail willen, und hat die selben wizz dargegeben mit der beschaidenhait, daz man ir allew jar ja^erlich an sant Bartholomeus abent begen sol ir jartag mit ainer selmess, und dez selben tags sol man ze capitell setzzen ainer jeglichen vrowen ain vigilij ze sprechen. Ez sol auch die selben wizz ain pytancerin innhaben mit stifften und mit sto^eren und chain abbatissin hat mit der selben wizz nicht ze schaffen wan dew selb pytantzerin sol allew jar ja^erlich dem convent mit dem dienst der von der vorbenanten wizz gevelt warten und sol den selben vrowen ze Slyerwach an den ta^egen die hernach geschriben an dem brief werden visch darumb chawffen und geben sol, (sic) am prehentach am liechtmezztag an unser vrowen tag in der vasten am antlazztag am o^estertag am aufferttag am phingstag an gotzleichnamstag an den zehen tawsent marterer tag Achacij und seiner gesellschaft am sunwentag an sant Peters tag an sant Marien Magdalenen tag an unser vrowen tag als sey verschaiden ist an unser vrowen tag als sey gepo^eren ist worden an sant Bartholomeus abent an sant Mychels tag an der ainliftawsent mait tag an aller heiligen tag an aller selen tag an unser vrawen tag als sey emphangen ist worden in ir mu^eter leichnam, an den zwaintzzich taegen die verschriben sint an aim jeglichen tag sol man den vrowen geben fisch umb fu^enftzehen phening. waer aver daz dew selb wizz die selben zehen schillinch phening nicht getragen mocht, welhes jars daz waer als vil dan an dem dienst abgieng als vil sol den vrowen an eim jeglichen tag an phening und auch an fyschen abgien. Ez hat auch swester Katherina geschafft zu dem covent unsers gotzhaws ein hoffstat gelegen ze Hofforn dew auch lehen gewesen ist von u^enserm genedigen herrn und stiffter unsers gotzhaws von herrn Ewerharten von Waltse, und dew selb hoffstat gilt allew jar jarlich zweliff phening und umb die selben zweliff phening sol man den vrowen weizz prot umb chawffen und geben allew jar ja^erlich am weichennachttag, und die selben hoffstat sol auch dew pytantzerin in haben. Daru^eber zu ainem waren sichtigen urchu^end der worhait geben wir vorbenantew Katharina dew abbatissin dem covent ze Slyerwach den offen brief versygelten mit unserm anhangenden insygel, und zu ainer pezzer bestaetigung der sach und der tayding mit unsers lieben gnedigen herrn und stiffters unsers gotzhaws herrn Ewerhartz von Waltse anhangendem insygel versygelten, wan daz geschehen (ist) mit seim gu^etlichen willen und wort. Der brief ist geben dez nechsten freytags nach sant Jacobs tag dez jars do man zalt von Christes gepu^ert drewtzehen hundert jar darnach in dem aecht und sechtzikosten jar.

Source Fulltext: OÖUB 8 (Wien 1883) S. 389ff., Nr. 393