ICH Jacob von Weinzu^erll, mein hausfraw Anna Chunratz dez Gu^otgesellen tochter dem Got genad, und mitsampt uns all unser eriben die wir haben oder noch gewinnen schullen wir tun kunt und vergehen, daz wir haben ze chawffen geben recht und redlich der ersamen wolbeschaiden gaystlichen vrowen vrowen Kathrein der Anhangerin chloster vrowen ze Slyrwach dez Ordens Cystercensis unsern hoff gehaizzen im Ra^ewt, da Dietel ze den zeiten aufgesezzen ist und ist gelegen in Chirichdorffer pharr, und haben ir denselben hoff geben umb ain gelt dez sew uns gentzlich und gar gericht und gewert hat, und der selb hoff ist unser rechtz lehen gewesen von unserm genedigen herren herrn Ewerharten von Waltse und haben ir den selben hoff geben mit allen den eren rechten und nu^etzzen und darzu^e geho^ert, und antwurten ir den selben hoff auz unser nu^etz und gewer in ier nu^etzz und in ier gewer und in dez coventz (sic) ze Slyerwach nu^etz und gewer in allen dem recht als wir in inngehabpt haben, wan dew vorverschriben vrow Kathrey dew Anhangerin chlostervrow ze Slyrwach ha^et geschafft den selben hoff im Raw^et nach irern to^ed zu^e dem covent ze Slyrwach. Wir haben uns auch dez selben hofs fu^erzich (sic) getan also, daz wir noch all unser eriben fu^erbaz nach dem vorverschriben hof niemer mer chain ansprach schullen haben weder mit recht noch an recht. wir sein auch dez vorverschriben hoffs der vorverschriben vrawen Kathrein und dez coventz ze Sfyrwach ier fu^erstant und ier rechter gewer swo in dez not geschicht, als chawfs recht ist in dem lant ob der Ens. waer daz in von uns an der gewerschaft icht abgieng da si schaden von nemen swie der schad genant wer, den selben schaden schullen wir in ablegen und widercheren mitsampt dem hawpgu^et gantz und gar. Daz in die red fu^erbaz also staet und unverchert beleib daruber ze ainem sichtigen woren urchund der worhait gib ich vorbenanter Jacob von Weinzu^erll in den offen prief mit meim anhangenden insygel versygelten, darunder ich mich verpint mit mein trewen ich vorbenantew vrow Anna sein hausfraw und all mein erben, allez daz staet ze haben daz vor an dem brief geschriben stet, und zu ainer pezzer sicherhait der warhait mit der erberen laeut anhangenden insygel versygelten Hermons dez Prawnspergers ze den zeiten lantrichter ze Slyerwach Jansen dez Ra^ewterz Hainrich dez Praunspergers Jansen von Grueb ze den zeiten margtrichter ze Chirichdorff wan sey der tayding redner und chawflewt gewesen sint. Der brief ist geben dez nechsten samtags nach dem auffert tag unsers herrn do man czalt von Christes gepu^ert drewtzehen hundert jar darnach in dem acht und sechtzikosten jar.

Source Fulltext: OÖUB 8 (Wien 1883) S. 382f., Nr. 386