Wir Katherinn von Gotes gnaden abbatissin ze den zeiten ze Slyrwach und der covent daselbs wir tu^en kunt, daz fu^er u^ens chomen ist Ludli und sein hawsfraw Elspet und ir paider erben, habent u^ens ermant mit gueter gewissen und mit priefen die sey gehabpt habent von Hainrichen dem Schichken eribrechtz auf dem halben hoff der gehaizzen ist der O^edhoff und ist gelegen am chirichperch in Chirichdorffer pharr und ist daz ober tayl, und habent Ludlin und seiner hawsfrawn Elspeten und iren paiden eriben daz selb eribrecht bestaeticht mit unserm prief den wir in darumb geben mit der beswaidenhait, daz u^ens der vorbenant Ludli oder sein hawsfraw Elspet oder ir paider eriben von dem selben eribrecht allew jar jaerlich dienen schu^ellen an unser vrawen tag ze der dienstzeit newn schilllinch und fu^enftzehen phening alter wienner mu^enzz und ain gans und zwai huener, ze weychennechten zwen ches oder sechtzehen phening und prot oder acht phening, ain vaschanghu^en, ze ostern zwen ches oder acht phening und sechtzich ayer. Und swan daz ist daz sew u^ens den vorbenanten dienst nach dem vorbenanten tag acht tag versezzen, so schu^ellen sew u^ens darnach sechtzich phening ze wandel verfallen sein. und wan daz ist daz sew irew recht an dem vorbenanten halben hoff verchawffen wolten oder mu^esten, daz schu^ellen sew tu^en u^ens an allen schaden. Und swer abvert der sol uns geben sechtzig phening und der aufvert auch sechtzig phening. Wer auch daz ez sich mit dem to^ed verwandelt, so schu^ellen sew uns dez selben rechtz gepunden sein. Daz in daz also staet gantz und unverchert beleib daruber geben wir in den offen prief besygelten mit unser vorbenanten vrowen vrowen Katherinen ze den zeiten abbatissin ze Slyrmach anhangunden insygel und mit dez coventz daselbs anhangunden insygel. Der prief ist geben dez eritags nach dem liechtmiss tag dez jars do man zalt von Christi gepu^ert drewtzehen hundert jar darnach in dem sybentzikysten jar.

Source Fulltext: OÖUB 8 (Wien 1883) S. 453f., Nr. 457