ICH Johans der Guttgesell mein hawsfraw vnd mit sampt vns all vnser eriben wir tun kunt vnd vergehen mit dem offen prief allen lawten gegenwertigen vnd chunftigen vmb den hoff im Rawt, den vnser lieber swager Jacob vnd vnser liebew swester vrow Ann sein elichew hawsfraw von Weinzurll hin habent geben den erssamen gaystlichen vrowen zu Slyrwach. Dez selben hoffs vnd waz darzu^e geho^ert verzeihen wir vns gar vnd gentzlich also, daz wir vnd all vnsser nach komen chain ansprach nach dem selben hoff vnd waz darzu^e geho^ert nicht mer haben schu^ellen weder mit recht noch an recht. Daz vnsern Lieben Genedigen Gaystlichen vrowen zue Slyrwach daz also staet vnd vnuerchert von Vns peleib, daruber geb wir in den offen prief Besygelten mit vnserm anhangenden Insygel, und zu ainer pezzer sicherhait der worhait mit vnssers lieben O^ehaims anhangenden Insygel versygelten Thomans dez Hayden der ez ze ainer gezeugnuzz der vor verschriben tayding vnd sach durch vnservleizzigen pet willen dar an gelegt hat im vnd sein eriben ane schaden. Der prief ist geben dez mitichens vor sant Margareten tag dez jars do man zalt von Christi gepu^ert drewtzehen hundert Jar darnach in dem sybentzkysten jar.

Source Fulltext: OÖUB 8 (Wien 1883) S. 476, Nr. 480