ICH Weynmar der Tewrwanger purger ze Steyr und mein hausfraw Chunigund und all unser erben verjehen, daz wir gegeben haben dem goczhaws und frawnchloster grabes ordens ze Slirbach daz gu^et dacz dem Senften genant an der Gesnaytt in Stainpecher pharr gelegen daz unser rechcz lehen ist von unserm genadigen heren hern Rudolffen von Walse von Ens also mit auzgenumen warten, daz daz obgeschriben gu^et nach mein obgenantes Weynmarn dez Tewrwanger tod dem vorgenanten goczhaws gevallen schol mit aller zugehorung auz meiner nucz und gewer in dy irn und schullen si mir denn und meiner hausfrawn und unsern vorvodern nach ires ordens gewanheit alle jar aynen jartag pegen mit eyner vigili und einer selmess in den acht tagen zenagst nach sunebenten und daz enphelch wir irr gewissen. Ich Rudolff von Waise vergich fu^er mich und mein pruder und unser erben umb daz gut daz Weynmar der Tewrwanger und sein hausfraw und ir erben dem egenanten goczhaws ze Slirbach gemacht und gegeben habent nach Weynmars des Tewrwanger tod alz oben benant ist, daz sew daz mit meinem gutem willen wart und gunst getan habent, und han auch dem offt genanten goczhaws dy lehenschaft gegeben durch Got und durch meiner vorfadern selhail, daz furbaz mein noch meiner pruder erben noch nachchomen chain ansprach nach der egenanten lehenschaft nicht mer haben schulten, wen ich daz pestett han fur mich und fur mein pruder und unser erben mit meinem insygel daz ich an den prief gelegt han. Daz dye wandlung also sta^et unverchert peleib daruber gib ich vorgenanter Weynmar der Tewrwanger und mein hausfraw und unser erben den prieff versigelten mit meinem anhangunden insigil und mit meins egenanten genadigen herrn hern Rudolfs von Walse anhangunden insigel, mit dez gunst und willen es geschehen ist. Der priff ist gehen nach Christi gepurd drewczehenhundert jar und darnach in dem ains und sibentzkisten jar dez suntags in der andern vastwochen.

Source Fulltext: OÖUB 8 (Wien 1883) S. 514f., Nr. 520