ICH Heinrich der Slosser von Wademspach mein hausfraw und mitsampt uns all unser payder erben wir tu^en chund und verjehen, daz wir haben cze chauffen geben recht und redleich der ersamen wirdigen und geistleichen und unsrer liben frawn frawn Kathrein ze den czeiten abtessin ze Slirbach und dem convent gemainchleich daselbs unsern czehent ze Weygersdorff auf der Cherglin lehen gelegen in Chirchdorffer pharr, und der selb czehent ist unser rechcz lehen gewesen von unserm gnadigen herrn hern Ewerharten von Walse saliger. wir haben in auch den selben czehent geben umb ein gelt dez sew uns gar und ga^enczleich gericht und gewert habent. wir haben in auch den selben czehent geben auf dem vorverschriben lehen mit allen den eren rechten und nuczen und darczu gehort auz unsrer nucz und gwer in ir nucz und gewer. wir haben uns auch den dez selben czehent auf dem selben lehen furczicht tan mit der beschaydenhait, daz wir und all unser erben und nachchomen chain ansprach darnach nicht mer haben schullen weder mit recht noch an recht. wir schullen auch dez selben czehencz ir fu^erstand und ir rechter gewer sein an aller der stat und in dez no^et und du^erft geschieht und auch alz chaufs und gewerschaft recht ist in dem lant ob der Ens. Gieng unsern lieben gnadigen frawn cze Slirbach an der gwerschaft von uns icht ab da sew schaden inn na^emen, wy der schad genant wa^er den dew selben frawn aynew gesprechen mocht pey ir gewissen an allez recht, den selben schaden mitsampt dem hauptgu^et schull wir in gar und ganczleich widerchern. Daz unsrer lieben gnadigen frawn frawn Kathrein der abtissin ze Slirbach und dem convent daselbs daz also sta^et gancz und unverchert von uns und von allen unsern erben und nachchomen ewichleich peleib, daz loben wir inn mit unsern trewn an aydez stat, und ze ainer pessern sycherhayt der warhait geb wir in den offen prieff pesigelten mit der erbern lawt anhangunden insigel versigelten Thomas dez Haydems Hansen des Rawters Heinrich dez Roselchofers Hansen von Gru^eb cze den czeiten markchrichter ze Chirchdorff, darunder wir uns verpinten und ich vorgenanter Heinrich Slosser mein hausfraw und all unser payder erben und nachchomen wan wir aygner insigel nicht enhaben, mit unsern trewn an aydes stat allez daz sta^et ze haben und ze volfu^eren, daz vor an dem priff geschriben stet, der geben ist dez nagsten erichtags nach sand Bartholomes tag dez jars do man czalt von Christi gepu^erd drewczehenhundert jar und darnach in dem ains und sibenkisten jar.

Source Fulltext: OÖUB 8 (Wien 1883) S. 540f., Nr. 545