ICH Dietrich der Losenstainer ich Rudolf der Losenstainer ich Hertel der Losenstainer und mitsampt uns all unser eriben wir tun kunt, daz Hainrich der Rytzzenwinchler und Peter sein prueder ain mu^el von uns ze lehen gehabpt habent, dew selber mu^el ist gelegen ze Micheldorff in dem dorff in Chirichdorffer pfarr und ist sechs schilling pfening geltz von der selben mu^el allew jar ja^erlich. Die selben mu^el und waz darzu^e geho^ert habent die ersamen gaystlichen und unser lieben vrowen vrow Kathrey ze den zeiten abatissin zu Slyerwach und der covent daselbs von den vorbenanten Rytzzenwinchlern und von allen iren eriben chawft gar und gentzlich, und sint zu uns chomen und habent uns gepeten daz wir in die selben lehenschafft und in die selber mu^el und waz darzu^e geho^ert ein freyes guet lazzen sein durch Got und durch unser sel hayl willen. Nu haben wir gedacht an all unser vorvarund und an unser muemen vrowen Annen seligen dew pey dem selben covent und gotzhaws leit, und habent in die selben lehenschaft aufgeben und geben inz auch auf daz ez ir freys eygen fu^erbaz sol sein ewichlich, und habent daz tan durch Got durch unser vrowen eren willen ze ainem hayl und ze aym trost allen unsern vordern uns selber und allen unsern eriben und nachkomen. Wir haben auch zu dem selben gotzhaws die vorverschriben lehenschaft auf der vorbenanten mu^el geben und frey und ledich lazzen mit der beschaidenheit, daz wir und all unser eriben und nachkomen chain ansprach niemer mer gehaben schu^ellen nach der selben lehenschaft weder mit recht noch an recht. Daz daz unsern lieben gaystlichen vrowen ze Slyerwach und dem covent daselbs daz also ewichlich staet und unzeprochen peleib von uns und von allen unsern eriben und nachkomen, daruber geben wir den ersamen gaystlichen und unsern lieben vrowen und dem covent ze Slyrwach den offen prief besygelten mit unser aller dreyer vorbenanten anhangenden insygel mit meins vorbenanten Dyetrichs dez Losenstainers mit meins vorbenanten Ru^edolfs dez Losenstainerz mit meins vorbenanten Haertleins dez Losenstainers. Und daz ist geschehen und der prief geben des nechsten phinstags nach sant Jacobs tag dez jarz do man zalt von Christi gepu^ert drewtzehen hundert jar und darnach in dem ains und sybentzikysten jar.

Source Fulltext: OÖUB 8 (Wien 1883) S. 535f., Nr. 541