WIR Katherina abtessinn ze Slyerbach graes ordens genant cysterciensis und mitsampt uns der gemain covent aller vrawen tun kunt, umb die zwen weingerten ze Newnburg in O^esterrich die do chlosterhalben gelegen sint, der ain in der Ziegelgru^eb zenehst dez herczogen weingarten dem Enser dez ein ganczes jeuch ist und ein drittail eins jeuchs dovon man alle jar dient vier emer weins in dem lehen ze rechtem perkchrecht und acht wienner pfening ze voytrecht dem erwern herren hern Eberharten von Cappelln und nicht mer, dann umb den andern weingarten am Aychweg zenechst pey hern Jo^ergen dez Tu^eczen weingarten gelegen dez ein ganczes jeuch ist, dovon man alle jar dient drey emer weins ze perkrecht und sehs wienner pfening ze voytrecht den gaistlichen herren von Paw^omgartenperg und niht mer, die weingerten paid uns und unserm vorgenanten chloster die erwerg vrawe Elispet witib Hansen dez Hosmu^ends selig der weilnt purgermaister und mautter ze Pazzaw gewesen ist, von besundrer lieb wegen die si zu uns hat leutterlich durch Got iren vodern selen und allen gela^eubigen selen zu einem ewigen hail ze rechtem aygen gegeben und vermacht hat, haben wir uns unser nachchomen und chloster verpuntten und verpintten uns auch mit dem prief alle die gedinge und artikel die hernach geschriben stent die die vorgenant vrawe Elispet nach rat mit gu^eter chuntschafft hat ausgenomen ze laisten und genczlich ze volfuren an alles gever. Dez ersten ist ze merchen, daz die selb vrawe Elispet vier pfunt alter wienner pfening ze einem ewigen jerlichen zins auf die vorgenanten zwen weingerten gelegt hat mit semlich er beschaidenheit, daz wir und all unser nachkomen dem gemainen covent aller vrawen fu^erbaz jerlich die selben vier pfunt pfening geben schu^ellen ze den tegen als hernach geo^effent wird halb in daz siechenhaus und halb in die pitancz, dovon auch wir und derselb covent alle jar vier jarteg begen schu^ellen aygenlich yden besunder mit aim pfunt pfening nach unsers ordens rechtikeit und nach go^etlicher gewonheit, darumb auch si unser und aller unser gewissen hat besweret. Den ersten jartag schu^ell wir begen an der zwair martrer tag Crispini und Chrispiniani in der gedechtnu^ezz irs vater sele Merteins dez Spehers von Salczburg, den andern an der heiligen junkfrawen tag sand Agathe irem capplan hern Go^etfriden, den dritten an sand Affre tag ze trost irs vorgenanten wirtes sel und den vierden an dem nehsten tag nach sand Marci tag dez ewangelisten ze hilf irr und irr vorgenanten mu^eter sel, und umb die selben jarteg haben wir ir fur uns und all unser nachkomen verhaizzen mit unsern trewen, und ze den vorgenanten tegen schu^ellen wir unserm covent die vier pfunt pfening geben als vor begriffen ist an alles gever. Ez ist auch mit worten ausgenomen, daz wir und unser nachkomen die vorgenanten zwen weingerten niht verchauffen mu^egen noch in dhein weiz verchu^emern die weil wir und unser vorgenantes chloster von dem heyligen stu^el ze Rom und von unsern stifftherren den von Waltse niht bestegt (sic) und ausgericht werden, und ob ez abgieng dez Got niht henge, so schullen die zwen weingerten nachfolgen den zwain junkfrawen Diemu^eten dez Holfu^ezzes tachter und Margareten Merteins dez Spehers tachter die wir durch Got herein zu uns in den orden genomen haben und mit den in ein ander chloster darein in denen fu^eglich ze varen ist gefu^edert und gevertigt werden. und daz schol geschehen mit hilf der abtessynn und mit zwain erwern die der vorgenanten junkfrawen nest freunt sint die daz tun schu^ellen leutterlich durch Got. Wu^erd aber daz offtgenant chloster erst nach der zwair junkfraun tod zesto^eret so schu^ellen die egenanten zwen weingerten gevallen an die zway siechenspital ze Salczburg und ze Pazzawe, der ain weingart in der Ziegelgrub gelegen schol volgen dem spital ze Salczbu^org dann der ander an dem Aichwege schol gevallen an daz spital ze Pazzawe am Rindermarkt, und die spitaler der selben spital schu^ellen sich der egenanten weingerten dann underwinden und vollen gewalt haben domit ze tu^on nach der spital nu^ecz waz si wellen, und daz schol geschehen an unsrer unser nachkomen und aller unsrer stifftherren ansprach und widerred. Und ze einem waren urchu^ent geben wir den prief mit unserm und unsers coventz insigeln und mit der erwern herren hern Michahels abptes ze Gocztal und seins coventz insigeln versigelt. Und ich Jo^erig von Waltse hern Eberharts von Waltse seligen sun der der vorgenanten chlo^ester erster stifter gewesen ist vergich an dem prief, daz die vorgeschriben sache mit meim und meiner nehsten freunt rat und willen geschehen ist und verpintt mich auch unter meins lieben vettern insigel hern Ru^egers von Waltse der die zeit mein und aller meiner hab verantwurter ist die vorgenant tayding stet ze haben und nimmer dawider ze tu^on an gever, und hat auch ze urkund sein insigel an den prief gelegt von unser paider wegen. Der prief ist geben ze Slyerbach am pfincztag nach unser vrawen tag ze lichtmezze nach Christi gepu^ert drewczehen hundert jar und in dem zway und sibenczigstem jare.

Source Fulltext: OÖUB 8 (Wien 1883) S. 568ff., Nr. 568