ICH Elispeth Hansen dez Hosmundes witib dem Got genad der weilent pu^orgermaister und mautter gewesen ist datz Pazzawe vergich, daz ich . . . meinen weingarten ze Newmbu^org in O^esterich chlosterhalben gelegen in dem Aychwege zenehst Go^erigen weingarten dez Tu^otzen dez ein gantzes jeu^och ist, dovon man auch alle jar dient dem erwirdigen gaystlichen herren hern Hansen abptt ze Pau^omgartenperg seim covent und allen iren nachkomen drey emmer weins in dem lesen ze rechtem perkchrecht und sehs wienner pfenning ze voytrecht, gegeben und gemacht han der erwirdigen gaystlichen fraw^oen vraw^on Kathrein abptessynn ze Slyerbach graes ordens genant cysterciensis, irem covent und allen iren nachkomen also, daz si den egenanten weingarten fu^erbaz innehaben su^ellen an mein und aller leu^ot irrsal. sein schol aber der vorgenant abptt sein covent und alle ir nachkomen an iren rehten niht engelten und alle handlung schol geschehen mit hant dez obgenanten herren hern Hansen abpt ze Pau^omgartenperg und aller seiner nachkomen an gever. Und ze pezzrer sicherhait han ich mit dez offtgenanten abptz hern Hansen hant recht und redlich fu^ertzicht getan und aufgeben der vorgenanten abptessynn irem covent und allen iren nachkomen ledichlich und freilich ze haben, doch unverzigen der rechten dez obgenanten abptes seins coventz und aller ir nachkomen. Ich han auch den obgenanten weingarten gegeben dem egenanten gotzhaus ze Slyerbach, daz si von dez selben gotzhaus habe alle jar jerklich und hinfu^er ewichlich raichen sullen zway pfunt alter wienner pfenning zu den zwain jartegen die hernach genant sint, und die selben pfenning su^ellen halb gevallen in daz siechhau^os und halb in die pitantze darumb derselb covent die zwen jarteg alle jar begen schu^ellen yglichem besu^onder mit eim pfunt pfenning nach dez ordens rechter gewonhait. Den ersten jartag schu^ellen si begen an sand Affre tag ze trost meins vorgenanten wirtes sele, den andern in crastino Marci ewangeliste in meiner und meiner lieben mu^eter Elispeten der Speherinn seliger gedechtnu^ezz. Und umb die jarteg paid ze volfu^eren haben si mir verhaizzen mit iren trewen an alles gever. Auch su^ellen si mir laisten die geding und artikel die ich von meines leibgedings und von andrer sach wegen han au^osgenomen nach sag der prief die ich darumb von in innehan. Und daz die red fu^erbaz stet und unzebrochen beleib, daru^eber gib ich obgenante Elispeth dem vorgenanten gotzhaus ze Slyerbach den gegenwortigen prief versigelten mit dez vorgenanten erwirdigen herren hern Hansen abptes ze Pau^omgartenperg insigel mit dez hant daz gemecht geschehen ist, und darzu^e mit seins coventz insigel und auch mit dez vesten ritter insigel meins lieben o^eheims hern Andre dez Haunsperger und mit Ru^egers insigel von Hu^ombrechtzried die zeit lantrichter ze Slyerbach .... Der prief ist geben do man zalt nach Christes gepu^ertt drew^ezehenhu^endert jar und darnach in dem zwai und sibentzigstem jar dez samztags nach unser frawen tag ze liechtmezz.

Source Fulltext: OÖUB 8 (Wien 1883) S. 572f., Nr. 570