ICH Elspeth Hansen dez Hosmu^endes witib dem Got genade der weilent purgermaister und mautter gewesen ist datz Pazzawe vergich, daz ich lautterlich durch Got durch aller meiner vodern und durch aller gelaubigen sel willen meinen weingartten ze Newmbu^org in O^esterich chlosterhalben gelegen Ziegelgru^ob zenehst dez hertzogen weingarten dem Enser dez ein gantzes jeuch und ein drittail eins jeu^ochs ist dovon man auch alle jar dient dem edeln herren hern Eberharten von Kappelln und allen seinen eriben vier emmer weins in dem lesen zu^o rechtem perkchrecht und achtt wienner pfenning ze voytrecht, gegeben und gemacht han der erwirdigen gaistlichen frawen vrawen Kathrein abptessinn ze Slyerbnch graes ordens genant cysterciensis irem covent und allen iren nachkomen also, daz si den egenanten weingarten fu^erbaz innehaben schu^ellen nu^etzen und niezzen mit allen den eren rechten und wirden die darzu^e geho^eren. Sein schol aber der vorgenant herre her Eberhart von Cappelln hau^optman ze Ens und alle sein eriben an iren rechten niht engelten und alle handlu^ong schol geschehen mit hant derselben perkchherren an gever. Und ze pezzrer sicherhait han ich mit dez obgenanten perkchherren hern Eberthartz von Cappelln, der dez egenanten weingarten rechter perkchmaister ist recht und redlich fu^ertzicht getan und au^ofgeben der egenanten abptessinn und irem covent und nachkomen ledichlich und freilich ze haben und allen iren fru^om domit ze schaffen als vorgeschriben stet, unverzigen dez perkchherren rechten und aller seiner eriben. Ich han auch den obgenanten weingarten gegeben dem egenanten gotzhau^os ze Slyerbach, daz si von ires gotzhaus habe alle ja^er jerklich ewichlich raichen schu^ellen zwai pfunt allter wienner pfenning zu^o den zwain jartegen die hernach genant sint, und die selben pfenning schu^ellen halbe gevallen in daz siechhau^os und halb in die pitantz, darumb derselb covent die zwen jarteg alle ja^er jerklich begen schu^ellen yglichem besu^onder mit eim pfu^ont pfenning nach dez ordens rechter gewonhait, den ersten jarta^eg schu^ellen si begen an der zwaier marterer tag Crispini und Crispiniani ze hilfe meins vater sele Merteins dez Speher den andern jartag an der heiligen ju^enkfrawn tag sand Agathe in der gedechtnu^ezz meins capplans her Gotfrides, und umb die jarteg paid ze volfu^eren haben si mir verhaizzen mit iren trewen an alles gever. Si schu^ellen mir auch laisten die geding und artikel die ich von meins leibgedings und von andrer sach wegen han au^esgenomen nach sag der prief die ich darumb von in innehan. Und daz die rede fu^erbaz stet und unzebrochen beleib daru^eber zu^o aim waren sichtigen und ewigen urchund diser sache so gib ich obgenante Elsbeth dem vorgenanten gotzha^eus ze Slierbach disen gegenwurtigen prief versigelten mit dez vorgenanten edeln herren insigel hern Eberhartz von Cappelln mit dez hant daz gemecht geschehen ist, und auch mit dez vesten ritter insigel meins lieben o^eheims hern Andre dez Hau^onsperger und auch mit Ru^egers insigel von Hu^ombrechtzried die zeit lantrichter ze Slierbach, under den insigeln allen ich mich verpintt mit meinen trewen an aydes stat alles daz stet ze haben daz vor an dem prief geschriben stet wann ich selber aygens insigels nicht enhan. Der prief ist geben do man zalt nach Christes gepu^ertt drewzehenhundert jar und darnach in dem zwaiundsibentzigstem jare dez samztags nach unser frawen tag ze liechtmezz.

Source Fulltext: OÖUB 8 (Wien 1883) S. 570f., Nr. 569