Ich Heinrich (Slosser) Chonrats su^en auf dem lehen dem Got genad und ich Kathrey sein hausfraw und mit sampt uns all unser eriben wir vergehen, daz wir umb den zehent auf der hu^obe ze Weigestorf darauf yczund D(yetel) aufsiczt und der ze lehen ist gangen von dem edeln herren hern Eberharten von Waltse (saligen), recht (und redleich) fu^erczicht getan haben und verzeihen uns auch dez mit dem prief also, daz wir (noch all unser) eriben fu^erbaz ewichlich dhein ansprach weder mit recht noch an recht nac(h dem selben czehe)nt sullen noch mu^egen haben an gever. Und dez ze ainem waren ewigen urkund geben wir den offen prief versigelten mit der erwern herren insigel Weikcharcz Pawrn die zeit schaffer ze Pernstain Ru^egers von Humbrechtzried die zeit lantrichter ze Slyerbach und mit Hiltprantz von Albrechczheim die zeit voytes ze Welse insigel versigelt. Der geben ist ze Slyerbach nach Christi gepurtt drewzehenhundert jar darnach an dem zway und sibentzigstem jar am mitichen nach sand Margarethe tag der junkfrawn.

Source Fulltext: OÖUB 8 (Wien 1883) S. 601, Nr. 599