Ich Ruger von Humrechczried ze den zeiten lantrichter ze Slyerbach mein hawsfraw und all unser erben verjehent, daz wir ze chauffen geben haben Hainreich dem Schuchsler von Wademspach seiner hawsfrawn und allen iren erben unser gut ze Wademspach, daz von meinem sweher sa^eligen herchomen ist und da der alt Sighart aufgesezzen ist und auch mein freis aygen ist, umb sechs und cwainczikch pfunt alter wienner pfenning, und han in auch daz selb gut geben mit allen eren rechten und nuczen und darzu geho^ert alz ez von alter herchomen ist, anz meiner nucz und gewer alz aygensrecht ist in dem land ob der Ens. war aber daz in an der gewerschaft icht abgieng da si schaden von namen, den selben schaden schullen si haben dacz uns und dacz aller unsrer hab. Daz in daz allso sta^et und unzerbrochen beleib, daruber gib ich vorgenanter Ruger von Humrechczrid in den brif versigelt mit mein anhangenden insigel, und zu einer pezzern sicherhait und geczewgnuzz mit dez erbarn Weikchart dez Paurn schaffer ze Pernstain anhangenden insigel und mit Hansen dez Ra^ewter anhangenden insigel und mit Gotschalch von Hanveld anhangenden insigel. Daz ist geschehen do man zalt von Christ purt drewczehen hundert jar und darnach in dem vier und sibenczigisten jar dez samcztag vor mitervasten.

Source Fulltext: OÖUB 8 (Wien 1883) S. 682f., Nr. 677