Ich Chuenrat der Hudernusch purger cze Gmunden mein hausfraw Elzpet und all unser erben und nachchomen wir vergehen, daz wir gesaczt haben unsern hof auf der Swant der da leyt in Lochircher pfarr und der rechtz vreys aygen ist, unserm swager Prawnen czden czeiten Ha^ellinger dacz Auzze, seiner hausfrawn und allen iren erben und nachchömen di sew haben oder noch gewinnent, umb czway und dreyzzigkh pfunt pfening allter wienner münzz auz unser nucz und gewer in ier nucz und gewer mit allen eren rechten und nüczen di darczw gehörent also werschaydenleich, daz wir in davon dienen schullen all jar jarleich an sand Michels tag drew pfunt pfening allter wienner mu^enzz und acht huener. Wir haben auch von yn herwider cze losen den vorgenanten hof all jar jarleich an sand Jörgen tag umb daz vorgeschriben gelt also ausgenomen, ob daz wär daz sich der vorgenant hof lenger würd gesten dann drew jar, so schol er unserz swagerz Prawnen seiner hawsfraw aller seiner erben und nachchomen chawftz gut sein also mit der weschayden, daz dy uberta^ewrung dez chawfs schol sten an czwain man daz wir dy cze payder seyten schullen nemen, und waz di sprechen da schol ez furbaz pey beleyben an allez gefär. Und daz in daz fu^erbaz stät und unverchertht beleib, czw ayner warn urchund geben wir in den prief versigelt ich vorgenanter Chunrat mit meim anhangundem insigel, und czw ayner pezzern sicherhayt der sach und czeugnu^ez versigelt mit dez erbern man Jörgen zden czeiten amptman cze Gmunden anhangundem insigel und mit Mathesen dez Schueler czden czeiten richter und amptman cze Gmunden anhangunden insigel, darunder wir uns verpinden mit unsern trewn an aydez stat allez daz stät cze wehalten und volfüeren daz oben an dem brief geschriben stet, ich vorgenanter Chunrat mein hausfraw und all unser erben und nachömen. Der brief ist geben nach Christes gepürd drewczehen hundert jar und in dem vier und sybenczgistem jar dez pfincztagz nach den ostern veyrtagen.

Source Fulltext: OÖUB 8 (Wien 1883) S. 693f., Nr. 684