ICH Rueger von Humbretzzried ze den zeiten lantricht er ze Slyerwach mein hawsfraw und ich Fridrich Ru^egers sun Weychartz des Cholen enichell und mitsampt uns all unser eriben wir tun kunt, daz wir haben ze chaw^effen geben recht und redlichen den erberen law^eten ze Chirichdorff Jansen von Grueb ze den zeiten margt richter daselbs Dyetrichen dem Tytzzel Fridrichen dem Ho^eltzzel Janselin dem Ju^edel und allen andern erberen law^eten daselbs, ez sein pfaffen oder layen die in unser vrawen zech sint ze Chirichdorff, unser vreys aygen datzz Widem gelegen in Chirichdorffer pfarr und ist gelegen pey dez pfarrers widem. wir habenz auch in unser vrawen zech und den erberen law^eten die darum sint geben für ayn freys aygen und haben inz geben umb ein gelt dez wir gar und gentzlich auz unser vrowen zech und von den erberen law^eten die in der selben zech sint gericht und gewert seyn. wir haben in daz selb vreys aygen datz Widem geben mit allen den eren rechten und nu^etzzen und darzu geho^ert auz unser nutz und gewer in ir nutz und gewer in allem dem recht als wirz inngehabpt haben. wir haben uns auch dez selben freyen aygens datz Widem fu^ertzieht tan mit der beschaiden, daz wir und all unser eriben die wir haben oder noch gewinnen nach dem selben freyen aygen chain ansprach niemermer gehaben schu^ellen. Wir schu^ellen auch dez selben freyen aygens datz Widem und waz darzu geho^ert ir rechter gewer und ir fu^erstant sein an aller der statt wo dez in unser vrawen zech und den eriben (sic) lawten die in der selben zech sint not und durft geschicht und auch als freys aygen und gewerschaft recht ist ist (sic) in dem land ob der Ens. Daz u^enser vrowen zech ze Chirichdorff und allen erberen lawten die darinn sint ez sein pfaffen oder layen daz also ewichlich von uns sta^et pelib daz loben wir in mit unsern trewen, und daruber geben wir den offen prief besygelten mit meins vorbenanten Ru^egerz von Humbrechtzried anhangenden insygel, und ze ainer pezzer sicherhait mit der erberen lawt anhangenden insygel versygelten Weychartz dez Pawren ze den zeiten schaffer ze Pernstain und mit Hainreichs dez Prawnspergers und mit Gotschalchs von Hanveld und mit Thomans dez Haydens und mit Jansen dez Raw^eters. Ich vorbenanter Fridreich Ru^egers sun von Humbrechtzried und Weychartz dez Cholen enichkl und all mein eriben verpinden under dew vorverschriben insygel uns mit unsern trewen an aydes statt wan wir aygens insygels ze den zeiten nicht gehabpt. Der geben ist an sant Marien Magdalenen tag dez jars do man zalt von Christi gepurt drewtzehen hundert jar und darnach in dem vier und sybentzkysten jar.

Source Fulltext: OÖUB 8 (Wien 1883) S. 712f., Nr. 700