Ich Vlreich der Tyminger. Ich Dietmut sein hausvraw. vnd mit vns alle vnser Erben. wie die genant sein. veriehen offenbar vnd tun chunt allen den. die den Brief sechent oder horent lesen. Daz wir wolbedacht vnd mit gutleichem willen. dem Ersamen gaistleichen herren Abt Dietmarn. cze Seytensteten. vnd dem wirdigen Gotshaus da selbn, reht vnd redleich cze chauffen habn gebn vmb achczich phunt wienner phenning. der wir gancz verriht sein vnd gwert, Die vier purchrecht mit sampt dem ansidel. die wir habn gehabt czden windeu. die vnser rechtz purchrecht gewesen sint, von dem Gotshaus cze Seytenstetn. da von wir dem selben Gotshaus alle jar gedient haben vnd gegebn achtzich wienner phenning, cze rechtem purchrecht, mit alln den nuczen vnd genuchtsam, vnd czu den selbn purchrechtn gehort vnd auch da von mugen chomen. cze holtz, cze veld vnd cze waid, besucht vnd vnbesucht, gestift vnd vngestift, gepavn vnd vngepavn, mit stiftung vnd mit storung, vnd mit alln rechten, swi so dev genant sein, also beschaidenleich daz der selbe Abt Ditmar cze Seytensteten vnd daz Gotshaus da selbn die vorgeschribn purchrecht in nutz vnd in gwer schulln habn. an alle irrung mit allen den nutzen vnd auch rechtn. vnd ez von alter her chomen ist, vnd wir sev haben gehabt, Vnd auch iren frumen da mit cze schaffn. mit verseczen. mit verchauffen vnd cze gebn wem si welln. als mit andern iren gechaufften purchrechtn. Wir schulln vnd welln auch der vorgenant purchrecht, vnd waz dar czu gehort, ir gwer sein für alle ansprach, an aller der stat. swo dem egenanten Abt Dietmarn cze Seytenstetn. vnd dem Gotshaus da selbn. dez not vnd durft geschiecht, als andrev purchrecht recht habnt in dem land cze Oestreich. Gesteund in darvber mit eim recht dhain chrieg indert auf von den vorgeschribn Purchrecht, von wem daz wer, dez si schaden nemen, den selbn schaden schulle wir in ganczleich abtun vnd wider chern. Taeten wir dez nicht, so schulln sev mit vnserm gutleichn willn an chlag vnd an allez recht dez selbn schadns bechomen, wie sev naest mugen, von vns vnd von allen dev, vnd wir habn, wo sevz anchomen, auf wazzer oder auf land. Vnd schulle wir noch ander niem von vnsern wegen, sev dar an mit nichtev irren. Daz die red also staet vnd vnczeprochen beleib. dar vber so gib ich vorgenanter. Vlreich der Tyeminger. in den offen Brief cze einem sichtign warn gezeug der sach, mit meinem anhangundn Insigel bestetigt, Vnd cze einer pezzer sicherhait der sach, so verpint ich mich. Ich Wolfker der wasner, vnder meinem anhangunden jnsigel. an meiner muemen Dietmutn stat, dez vorgenantn vlreichs, dez Tyeminger hausvrow. vnd an aller ir Erben stat, mit der gutleich wille der chauff geschechn ist, der vorgenantn purchrecht, auch gwer sein mit sampt in vnd aller der red, als vorgeschribn stet, staet ze habn. Vnd cze pezzer sicherhait mit des Erbern Herren hern Jansen von Chunring, obristen Schenchen in Oesterreich vnd Hauptman cze Ens, vor dem die sach getaidingt vnd gewandelt, auch anhangunden insigel bestetigt, vnd beuestet auch mit Hainreichs des Wasner von Chrellendorf anhangunden Insigel, der von sunder pett sein insigel cze einem geczeug dar czu gehangen hat, Der prief ist geben an sand Margaretn tag, do man czalt von Christs gepurt, Drewczechen hundert jar, vnd dar nach in dem sechs vnd vierczigsten Jar.

Source Fulltext: RAAB, Seitenstetten (=FRA II/33, Wien 1870) S. 220-222