Wir Johanns von gots gnaden Byschof ze Gurk Bechennen und tun chunt offenlich mit dem briefe, daz wir als ein Gerhab der hochgeborn unsrer lieben herren Graf Hainreichs und Graf Johanns Meinhart von Goertz mit den erbern weysen .. dem purgermaister .. dem Richter.. dem Rat und der gantzen Gemain, der Stat ze Wienne geraitet haben, von des geltes wegen, daz die eegenante Stat ze Wienne, derselben unsrer vorgenanten herren von Goertz, vater Graf Mein-harten von Goertz seliger gedêchtnuesse, In selber, oder iren erben schuldig ist beliben, von des gewoendleichen dienstes wegen, so dieselb Stat, den obgenanten herren von Goertz nach irer brief lautung jêrleich raicht und geit, von der Sechstausent phunt wegen, die si In schuldig ist. Also daz si daran untz auf den Mentag, vor dem nachstvergangen Weichnachtag von allen ver-gangen zeiten, und quatembern, alles dienstes nicht mer schuldig ist beliben, denn Tausend phunt, und fuemftzig phunt wienner phenning, der si uns, an stat, unsrer obgenanten herren von Goertz, gar und gêntzleich verricht und betzalt habent, und sagen auch si, desselben dienstes, alles, an derselben herren von Goertz stat, waz In des untz auf den vorgenanten Mentag vor dem nachstvergangen Weichnachtag verhalten ist, gar und gêntzleich ledig und los von aller ansprach. Und des zu urchund geben wir In und iren nachkomen, den offenn brief mit unserm anhangendem Insigel, versigelten, der geben ist ze Wienne, an sand Angnesen tag Nach Kristi geburd drewt-zehenhundert jar darnach in dem acht und achtzigistem jare.

Source Fulltext: Peter Peusquens