Den erbern weysen .. dem Purgermaister .. dem Richter und .. dem Rat der Stat ze Wienn. Embiete ich Agnes weilent Hainreichs seligen von Durrenpach der von Meysaw schreiber, witib die nu Engelharten den Gruber, eleichen genomen hat, mein dienst ich lasse ewr erberchait wizzen, daz ich mein leibgeding, und alle meinew recht, die ich gehabt hab an dem haws gelegen an dem Altenfleischmarkcht ze Wienn zenegst dem haws daz weilent Ruegers seligen des Muenichs gewesen ist, verchaufft hab, den erbern geistleichen herren bruder Hannsen zu den zeiten Pryor und dem Convent gemain, der geistleichen herren Chloster, datz unser frawn Porten ze Axspach und irn nachkomen. Davon pitt ich ew mit gantzem ernst und fleizz daz ier den egenanten geistleichen herren den vorgenanten chauf, mit ewr Stat gruntinsigil bestet und vertiget als sit und gewonhait ist, daz ist mein gutleich wille, und waz auch der egenant mein wirt, Engelhart der gruber, von desselben chawfs wegen tut und handelt daz sult ir Im gelauben und stat tuen als ob ich selber daengegen waer. Mit urchund ditz brifs besigelt mit meins bruder Insigil Petreins des Horracher, und Hannsen des Frawndorffer, bayden auf gedrukchten Insigillen. Geben an Mittichen vor sand Cholmans tag anno etc. LXXXX primo.

Source Fulltext: Peter Peusquens