Ich Hanns Uelreichs Sun (von) Tulln dem Got genad, Vergich fuer mich und fuer mein Erben und tûn kunt, offenleich mit dem brief das mich die erbern lêut, her Ruedolf der Angervelder die zeit des Rates der Stat ze Wienn und Pilgreim der Snaetzel purger daselbens, und zu den zeiten bayd, ausrichter der Stat Gruntpuech ze Wienn, verrichtet und gewert habent hundert phunt, und zwaintzig phunt wienner phening die ich und Niclas Oswalt zu dem egenanten Gruntpuech nider gelegt haten, von des hauses wegen, gelegen in der hindern Pekchenstrazz ze Wienn, zenechst sand Philipps und sand Jacobs kappellen Und sag auch ich an stat mein selbs und aller meiner Erben, die egenanten hern Ruedolfen den Angervelder Pilgreimen den Snaetzel und ier Erben, und auch die Stat ze Wienn, der egenanten hundert phunt und zwaintzig phunt phening gantz und gar ledig und los Und wand ich selber aigen insigil nicht han Darumb so gib ich In den brief ze einem warn uerchund der sach versigilten mit der zwaier erbern Mannen insigiln hern Niclas des Schêbnitzer, die zeit auch des Rates der Stat ze Wienn, und Michels des Mênscheins, purger daselbens, die ich des vleissichleich gepeten han das Si der sach getzeugen sind mit iren insigilen In an schaden daruender ich mich verpind mit meinen trewn angevêr alles das staêt ze haben das vor an dem brief geschriben stet Der geben ist nach christi gepurd drewtzehenhundert Jar darnach in dem Sechs und Newntzgistem Jar des nêchsten Mitichens nach sand Augustins Tag.

Source Fulltext: Peter Peusquens