Wir Albrecht von gots gnaden Hertzog ze Osterreich ze Steyr ze Kernden und ze Krain Grave ze Tyrol etc. Bekennen Als unser getrewer Gilig der Kersperger unser Tuerhuetter unserm getrewn Leben unserm valkner ze kauffen geben hat, den halben tail an dem Haus und Stadel hie ze Wienn, vor Stubentor in dem Gereutt zenachst Hannsen des Trautmans haus, daselbs gelegen, den wir demselben unserm Turhuetter vormalen gegeben haben, daz wir zu demselben kauff, unser willen und gunst haben gegeben, und den bestêtt wissentlich mit dem brief, also daz der egenant Leb unser valknêr, und sein Erben mit demselben halben tail, an dem egenanten Haus und Stadel, nu furbazzer Iren frumen handeln und tuen muegen als mit anderr Irr aigner hab, an unser und unserr Erben, und maenicleichs Irrung und hindernûzz, an gever. Mit urkund ditz briefs. Geben ze Wienn an unsrer frawen tag ze der Liechtmesse Nach Kristi gepurd dreutzehen hundert jar darnach in dem Siben und Newntzigistem jare. dominus dux aud(ivit).

Source Fulltext: Peter Peusquens