Ich Hanns von Swechent der floetzer ze wienn, und ich Anna sein hawsfraw, veriehen offenleich mit dem brief, das uns die erbern weisen, her Hanns der Mosprunner, diezeit des Rats der Stat ze wienn, und Oswalt der Pawch purger daselbs baid ausrichtter des geschêffts so Hanns Arnstorffer seliger getan hat, ausgerichtet und gegeben habent, dreissigk phunt wienner phennig, als das derselb Arnstorffer seliger durch gots willen, armen junkchfrawn geschafft hat ze geben, und sagen auch wir und unser erben, die egenanten Geschêfftherren. und ier erben der vorgenanten dreissig phunt phennig, gantz quitt ledig und los. Mit uerchund des briefs besigilt der zwayer erbern mann Insigiln, hern Chlawsen des Prêwssen, dietzeit des Rats der Stat ze wienn, und Spitalmaister daselbs und Joergen von Nicolspurg burger daselbs, die der sach durch unser vleis-siger pet willen getzewgen sind mit Iren aufgedrukchten Insigiln, In an schaden. Dar under wir uns mit unsern trewn angever verpinden alles das stêt ze haben, das vor an dem brief geschriben stet, wann wir selber nicht aygen Insigiln haben. Geben ze Wienn an sand Lucein tag. Anno etc. CCCCo Xo.

Source Fulltext: Peter Peusquens