Ich Hans Strozzer Richter ze Newnkirchen Tuon kunt allermenglichen mit dem prief Als ich mein haws gelegen zuo Wyenn an dem Harmarkt recht und redlich verchawt hab dem erbern mann Jacob dem Olmansperger purger daselbs ze Wienn Also hab ich meiner lieben hawsfrawn Anastasien und meinem lieben Swager Tylman dem beger irem pruoder vollen und gantzen gewalt geben und gib auch mit dem brief den selben kawf ze volfueren und das haws aufzegeben und ze vertzigen und alles das ze tuend daz darzuo gehoert und notdurftig ist nach der stat recht ze Wyenn und lûb alles das stet ze halten daz si in der sach tuend an gever Und des zuo ainem waren urkuend hab ich mein aigen Insigel gedrukt auf den prief der geben ist nach cristi gebuerd vierzehenhundert jar dar nach in dem viertzehenden jar an freytag vor sandt Agnesen tag der heiligen Junkfrawn.

Source Fulltext: Peter Peusquens