Wir Albrecht, von gotes gnaden, Hertzog ze Oesterreich, ze Steyr, ze Kêrnden, und ze Krain, Grave ze Tyrol etc. Bekennen. Daz uns der erbêr Priester, Hanns von Waydhoven, Capplan der kappellen zu der heiligen drivaltikeit ze Wienn fuergelegt hat, wie er derselben Cappellen haws gelegen am kienmarkt daselbs ze Wienn, hinder des Scheibelwisêr haws, und stosset ainhalben, an Heinreichen des leynwatêr haws, derselben Cappellen ze nutz und fueg verkauffen, und das gelt, darumb er, das verkauffte, der Cappellen anderswa da es nûtzleicher wêr, anlegen wolte. Und bat uns diemueticleich, Im, des ze verhengen, und unser gunst dartzue ze geben. Haben wir angesehen, des yetzgenanten Priesters begierd, und haben dadurch, und auch um nutz und auf-nemen, der egenanten Cappellen, der lehenherr wier sein, zu soelichem verkauffen unser gunst und willen gegeben wissentleich mit dem brief. In soelicher mass, daz er, das gelt, darumb er, dasselb haws gibt, bei dem Gruntpuoch, in unser Stat Rate zu Wienn nyderlegte, da zu ligen, untz daz man ander nûtz und gûlt, die der offtgenanten Cappellen fuegleich sein, darumb herwider kauffe. Und emphelhen ernstleich, den erbern weisen, unsern lieben getrewn .. dem Burger-maister .. dem Richtêr, und .. dem Rat, derselben unserr Stat ze Wienn, daz Si, denselben kauff mit irêm GruntInsigel bestêtten und verttigen, als soelicher kauff und der Stat Recht und ge-wonheit ist, an gevêr. Mit urkunt ditz briefs. Geben ze Wienn, an Sant Bartholomes tag. Anno domini Millesimo Quadringentesimo Quartodecimo. d(ominus) d(ux) in cons(ilio).

Source Fulltext: Peter Peusquens