Allen^a) den, die disen brief an sehent lesent oder ho^erent lesen, tůn ich Růdolf der Ma^eyer von Altstetten kunt vnd vergich des offenlich mit disem brieue fúr mich vnd fúr alle min erben, daz ich mit gůter vorbetrahtung || vnd beschaidenhait von miner redlichen not wegen redlich vnd reht verkoft han ainen drittentail des ma^eyeramtes ze Altstetten mit gerichten mit twingen mit ba^ennen mit allen rehten nútzzen || vnd gewonhaitten vnd mit aller zůgeho^erd, des selben ma^eyeramtes ain drittail des gotzhus ze sant Gallen ist vnd ain drittail mines vettern Eglolfs von Altstetten vnd ain drittail min gewesen || ist vnd von dem gotzhus ze sant Gallen lehen ist, vnd han ze koffenn geben dem erwirdigen minem gna^edigen herren abt Georiien von gottes gnaden abt des gotzhus ze sant Gallen vnd dem selben gotzhus vmb ahzig pfunt pfenning gůter Costentzer mv´ns, der ich och gentzlich von im bin gewert an den stetten, da ich minen nutz vnd fromen mit geschaffet han, vnd han och den selben minen drittentail des vorgeschriben ma^eyeramtes mit gerichten mit twingen mit ba^ennen mit allem dem, so von reht vnd von gewonhait darzů vnd darin geho^eret, es si gesůcht oder vngesůcht, es si funden oder es werd noch funden, minem vorbenemten herren mit des vorbenemten Eglolfs mines vettern willen vnd gunst vfgeben vnd geuertegot zů sinen vnd zů des selben gotzhus handen, als reht sitt vnd gewonlich was, vnd han mich och darúber verzigen vnd verzih mich mit disem brieue fúr mich vnd fúr alle min erben gen minem vorbenemten herren abt Georiien gen sinen nahkomen vnd gen dem selben gotzhus ze sant Gallen aller aigenschaft aller manschaft aller lehenschaft aller kuntschaft aller besatzzung aller gewer aller zúgnust lút vnd brief alles rehten gaistlichs vnd weltlichs gerichtz aller vordrung vnd ansprach, so ich zů dem selben drittentail des vorgeschriben ma^eyeramtes hatte ald noch hienach daran iemer gehaben gewinnen oder erwerben mo^eht von reht von gewonhait ald von dehainen andren sachen. Ich han och gelobt vnd loben mit disem brief fúr mich vnd fúr alle min erben vnd nahkomen, die ich vestklich herzů bind, des selben drittentails des vorgeschriben ma^eyeramtz vnd och des kofs reht wer ze sinne nach dem rehten gen maniglichem vff gaistlichem vnd vff weltlichem gericht, wenn ald wa ald wie dik sin der vorbenemt abt Geo^eri sin nahkomen vnd das vorgedaht sin gotzhus des bedurfent vnd notdúrftig sint ald darumb angesprochen oder vfgetriben werdent, das ich vnd min erben sú darumb verstan versprechen vnd von der ansprach entrihen vnd ledig machen sont ân fúrzug vnd gentzlich ân allen irn schaden. Vnd des ze warem vrkund vnd sta^eten sicherhait aller vorgeschribener ding han ich Růdolf der Ma^eyer von Altstetten da vorgenant min insigel fúr mich vnd fúr min erben offenlich gehenkt an disen brieue. Der geben ist ze Wil in der stat an dem na^ehsten mentag vor sant Mathyes tag in dem jar, do man zalt von gottes gebúrt drúzehenhundert jar, darnach in dem fúnf vnd sibentzigosten jar.

Source Fulltext: Chartularium Sangallense IX, Nr. 5442, S. 117-118.