Wir Geori von gottes gnaden abt des gotzhus ze sant Gallen¹, das an alles mittel zůgeho^ert dem stůl ze Rôme, veriehen vnd tu^en kunt offenlich mit disem brieue allen, die in || an sehent oder ho^erent lesen, das fúr v´ns kam ze Wil² in v´nser stat des na^ehsten samstags nach sant Valentins tag, da wir offenlich ze gericht sassent, der fromm v´nser vnd v´nsers || gotzhus lieber getruwer dienstman Cristoffer der Ma^eyer von Altstetten³ kilchheir der kilchen ze Lvstnôw⁴, vnd offent da mit sinem fúrsprechen vnd sprach, das er || mit gůter vorbetrahtung vnd beschaidenhait von besunder gnad wegen, so er zůz v´ns vnd v´nserm gotzhus hetti, ainen dritten tail des ma^eyer amtes ze Altstetten mit gerichten mit twingen mit ba^ennen vnd mit allem dem, so von reht vnd von gewonhait darzů vnd darin geho^eret, es si gesůcht oder vngesůcht, es si funden oder es werd noch funden, das selb mayer amt sin vnd Růdolfs sin brůders⁵ vnd Eglolf von Altstetten⁶ sins vettern reht gemaind wa^eri vnd von v´ns vnd v´nserm gotzhus lehen wa^er, redlich vnd reht verkoft hetti vnd hett ze koffenn geben v´ns vnd v´nserm gotzhus ze sant Gallen vmb ain lipding, das wir im darumb geben haben, als wir mit im v´berain komen sîgen, als der brief⁷ wist vnd sait, den er darvmb von v´ns hat, vnd wolte v´ns och das selb ma^eyeramt vfgeben vnd vertegon vnd zů v´nsern vnd v´nsers gotzhus handen bringen, als reht wa^er, vnd batt v´ns erfarn an ainer vrtail, sid er ain kilchheir wa^er, wie er das tůn solti, das es kraft hetti nv vnd hernach. Do fragtont wir vrtail vmb vnd ward ertailt mit gemainer vrtail, das er ainen vogt nemen solti an dem ring, wen er wo^elt, vnd aber denn bescha^eh, als reht wa^er. Do nam er ze vogt den fromen man Albrehten von Lindenberg⁸ schulthais ze Wil, dem wir och die vogty nach v´nsers gotzhus gewonhait verlihen vmb die sach, do batt v´ns aber der selb vogt mit sinem fúrsprechen erfarn an ainer vrtail, wie der vorgenant Cristoffer nv farn vnd sich sins drittentails des selben ma^eyeramtes verzihen so^elt, als reht wa^er. Do fragtont wir vrtail vmb vnd ward ertailt mit gemainer vrtail, das er den selben sinen drittentail des vorgeschriben ma^eyeramtz mit siner vnd mit des vorbenemten sins vogtes handen vnd och mit der vorbenemten Růdolfs sins brůders vnd Eglolf sins vettern siner gemainder willen vnd gunst vf geben so^elt an v´nser hand zů v´nsers vorgeschriben gotzhus handen vnd das es also wol kraft hetti vnd haben mo^eht nv vnd hernach, das tett och er vnd gab och do ze stett der vorbenemt Cristoffer mit gůter vorbetrahtung vnd beschaidenhait mit siner vnd mit des vorbenemten Albrechtz von Lindenberg sins vogtes handen vnd och mit des vorbenemten Růdolf des Ma^eyers sins brůders willen vnd gunst, der vnder ôgen ze gegen stůnd an dem gericht, sinen drittentail des vorgeschriben ma^eyer amtes ze Altstetten mit gerichten twingen vnd ba^ennen mit allem dem, so von reht vnd von gewonhait darzů vnd darin geho^eret, es si genemt oder vnbenemt, gesůcht oder vngesůcht, es si fvnden oder es werd noch funden, letklich vnd frilich vf an v´nser hand zů v´nsers vorgeschriben gotzhus handen, vnd zogte vns och do ze stett offenlich in gerichte ainen brief⁹ besigelt mit des vorbenemten Eglolfs von Altstetten insigel daran vnd damit er och sinen gůten willen vnd gunst herzů vnd hierúber geben hat. Vnd enzeh sich och do ze stett der vorgenant Cristoffer mit siner vnd mit des vorbenemten sins vogtz handen, als gericht vnd vrtail geben hatte, fúr sich vnd fúr alle sin erben vnd enziht sich och mit disem brief gen v´ns vnd gen v´nsern nahkomen vnd gen v´nserm vorgeschriben gotzhus ze sant Gallen aller aigenschaft aller lehenschaft aller manschaft aller kuntschaft aller gewer aller zúgnust lút vnd brief alles rehten gaistlichs vnd weltlichs gerichtes aller vordrung vnd ansprach, so er zů dem selben drittentail des vorgeschriben ma^eyeramtes hatte oder hernach iemer gehaben gewinnen oder erwerben mo^eht von reht von gewônhait oder von dehainen andren sachen. Der vorbenemt Cristoffer hat och gelobt fúr sich vnd fúr alle sin erben, des selben drittentails des vorgeschriben ma^eyeramtes vnd och des kofs reht wer ze sinne nach dem rehten gen maniglichem vff gaistlichem vnd vff weltlichem gericht, wenn ald wa ald wie dik wir oder v´nser nahkomen sin bedurfent vnd notdúrftig sint ald darumb von iemannen vfgetriben vnd angesprochen werdent, das er v´ns darumb ân allen v´nsern schaden verstan vnd versprechen sol vnd von der ansprach entrihen vnd ledig machen ân alle geuerd. Darnach baten wir, v´ns des gerichtz brief hieruber geben, der ward v´ns och ertailt. Vnd des ze ainer warhait aller vorgeschribener ding vnd gedingde henken wir abt Geori da vorgenant v´nser insigel von des gerichtz wegen an disen brief. Darnach veriehen wir die egenanten Cristoffer vnd Růdolf der Ma^eyer gebrůder vnd Albreht von Lindenberg vogt in dirr vorgeschriben sach ain gantz warhait aller vorgeschribener ding vnd gedingd vnd das alles das wâr ist, das der erwirdig v´nser gna^ediger herre abt Geo^eri da vorbenemt von v´ns veriehen hat an disem brief, vnd das och dirre vorgeschriben kôffe vnd dise vergunst mit minem des vorbenemten Růdolfs des Ma^eyers gůten willen vnd gunst beschehen vnd volfu^ert ist. Vnd ze merer sicherhait der selben ding henken wir och v´nsri insigel an disen brief. Der geben ist ze Wil an dem vorgeschriben samstag mit rehter vrtail in dem jar, do man zalt von gottes gebúrt drúzehenhundert jar, darnach in dem fúnf vnd sibentzigosten jar.

Source Fulltext: Chartularium Sangallense IX, Nr. 5441, S. 115-117.