Wir^a) Cůn von gottes gnaden abt des gotzhus ze sant Gallen², das a^vn alles mittel zů geho^ert dem stůl || ze Ro^vm, veriehent offenlich mit disem brief von der misshellung vnd sto^ess wegen, die wir hatten mit der êrsa||men frowen fro Agnesen herr Eglolfs von Wolfurt³ elichen tohter V^olrichs von Ebersperg⁴ elichen wirtinnen vmb irn || tail des mayeramptes ze Schefftno^vw⁵, das wir da frúntlich vnd lieplich mit enandern geainbert sigint mit so^elicher beschaidenhait vnd gedingde, das die vorgenant fro Agnes des egenanten V^olrichs von Eberspergs elichi wirtinne vnd ir erben den selben tail des mayeramptes ze Schefftnow in pfandes^b) wise haben vnd niessen sont a^vn alles abschlahen vnd abniessen der nútz, alle die wil wir oder vnser nachkomen den selb tail des mayeramptes von ir oder von ir erben mit zwain hundert pfund gůter vnd ga^eber Ytaliger haller nút gantzlich vnd gar erledgot noch erlo^est habint. Vnd wenn wir ald vnser nachkomen die selben fro Agnesen V^olrichs von Eberspergs elichi husfro^vw oder ir erben, ob si enwa^er, ermanent mit zwain hundert pfund hallern vor sont^c) Johans tag des To^vffers ze sunnwendi, so sont si v´ns der losung statt tůn a^vn allen fúrzug vnd widerred. Wenn o^vch die selb fro Agnes ald ir erben, ob si enwa^er, von v´ns ald von vnsren nachkomen der vorgeschribenn zwain hundert pfund haller gůter vnd ga^eber Ytaliger haller gantzlich vnd gar gewert vnd vsgeriht werdent vor dem vorgenanten sont^c) Johans tag des To^vffers ze sunnwendi, so sol v´ns vnd vnsren nachkomen vnd dem vorgenanten gotzhus ze sant Gallen dannenhin der vorgeschriben fro Agnesen tail des mayeramptes ze Schefftno^vw gantzlich vnd gar ledig sin von ir vnd allen iren erben vnd nachkomen. Lo^estin aber wir nach dem vorgenanten sant Johans tag des To^vffers ze sunnwendi, so wa^er der nûtz, so des iars von dem vorgenanten mayerampt geuiel, der vorgenempten fro Agnesen V^olrichs von Eberspergs elichen husfrowen vnd ir erben gantzlich vnd gar genauen vnd nút fúro. Vnd ze ainem waren offenn vrkund aller vorgeschribner ding vnd gedingde haben wir abt Cůn da obgenant vnser insigel gehenkt an disen brief. Der geben ist ze Wil⁶ in vnser statt in dem jar, do man zalt von gottes gebúrt drúzehenhundert jar vnd zwai vnd ahtzig jar, an dem na^ehsten zinstag vor sant Johans tag des To^vffers ze sunnwendi.

Source Fulltext: Chartularium Sangallense X, Nr. 5908, S. 72-73.