Allen^a) den, die disen brief ansehent lesent oder ho^errent lesen, kúnd ich Bernhart Diethelm des Blarrers || sa^eligen elicher sun vnd vergich des offenlich an disem brief fúr mich vnd all min erben, daz ich mit gůter || vorbetrahtung vnd nah minr frúnd ra^vt kam fúr den erwirdigen minen gna^edigen herren Cůnen von gottes || gnaden abt des gotzhus ze sant Gallen¹ vnd gab im in sin hand frilich vnd willeklich vff Cristan Laidrer, der min lehen was von dem gotzhus ze sant Gallen, also dz er nû hinnanhin an das vor(genempt) gotzhus ze sant Gallen geho^erren vnd aigen sin vnd dz ich noch min erben dekain reht von lehenschaft noch von aigenschaft zů sinem lib zů sinem gůt noch zů sinen nachkomen niemer me haben noch gewinnen sont weder bi leben noch nach to^vd weder an gaistlichem noch an weltlichem geriht noch an geriht, vnd sol ôch des wer sin, als dikk vnd der vorg(enempt) Cristan Laidrer vnd das vor(genempt) gotzhus des no^vtdurftig sint. Vnd han darvmb von dem ietz genempten Cristan enphangen núnzehen phund phennig Cost(enzer) múnse, der ich ôch gantzlich von im gewert bin vnd an minen offenn nutz bekert. Vnd des ze ainer sta^eter ewiger sicherhait so han ich obgen(empter) Bernhart Diethelm Blarrers sa^eligen elicher sun min aigen insigel gehenkt an disen brief, vnd ze noch merer sicherhait der obgeschribner ding han ich erbetten minen lieben vettern Bartholome den Blarrer vnd den fromen Othmar Wildrichen, dz si baid ir insigel zů minem an disen brief gehenkt ha^vnt, des ôch wir die ietz genempten Bartholome der Blarrer vnd Othmar Wildrich veriehen, dz wir von ernstlicher bett wegen des obgen(empten) Bernhartz vnsri insigel zů sinem gehenkt ha^vnt an disen brief vns vnd vnsren erben ga^entzlich vnscha^edlich. Geben ze Wil² an der na^ehsten mittwuchen nach sant Martis tag, do von Cristi gebúrt waren drúzehenhundert jar vnd ains vnd ahtzig jar.

Source Fulltext: Chartularium Sangallense IX, Nr. 5879, S. 540.